Shillong, Iaiong, 04: Ka seng Khasi Syudent Union (KSU) mynta ka sngi sa shisien kala rakhe ia “Ka Sngi Kyrsiew Ri” ka phang kaba ka seng kala shim mynta u snem ha kaba rakhe ia kane ka sngi kyrpang ka long ban pyrshah ia ki kam tih uranium ha kane ka bri jong u hynniewtrep.
Ha kane ka sngi ka KSU kala pynlong da ka jingiaid paidbah na wah Umkaliar sha duh Nongmynsong ha jan jong ka ophis jong ka Atomic Minerals Department (AMD) jong kaba sorkar pdeng kaba don ha kane ka jaka. Ha katei ka jaka ba don kane ka ophis jong ka AMD na ka liang jong ka KSU kala pynpaw ia ka jingpyrshah jong ka da kaba thang ia ki tyngshop.
Ha kane ka sngi palat hajngar ngut ki dkhot jong ka seng KSU na kylleng kylleng jong ki Unit bad ki shnat kila ia poi sha kane ka jaka ban ia shim bynta ha kane ka jingrakhe ia kane Ka Sngi Kyrsiew Ri, 2017 ha ryngkat ka riam ka beit tynrai ha ryngkar ka phawar ka Risa.
Ha ka jingkren jong u u President ka KSU, u bah Lambokstar Marngar u la ong ba lada ka UCIL ne ka AMD ka pyrshang ban tih da ka bor ia u marpoh khyndew u uranium ha kane ka jylla, ki hap pynbna ba ka UCIL bad ka AMD kidei ki nongshun jong ka jaidbynriew Khasi bad lada mih ka jingia um snam , ka sorkar pdeng, ka UCIL, ka AMD bad ka sorkar jylla kidei ban shim ia ka jingkitkhlieh.”
La ong ba ha kine ki khyndiat bnai ka UCIL ka la jurip ia ka Domiasiat ha West Khasi Hills kaba long ka jaka pdeng ba don u Uranium ha kane ka jylla, da kaba pyrshang ban ialam bakla ia ki paidbah ba kin shah ban tih ia uranium na bynta ban wanrah ia ka roi ka par ha kane ka thain.U ne u nongialam jong ka KSU u la ong ba kan nym don ka roi ka par hynrei kan don tang ka jingiap ha ka jylla hi baroh kawei.
Haba iadei bad kane, na ka laing ka seng ka la ong ba lada ka UCIL ka bteng ban tih ban pyndonkam da ki buitpoh ban pynbeij ia ki paidbah ka thain, ki shim da ka rai ban weng noh ia kane ka cooperation na kane ka jylla Meghalaya. La ong ba don katto katne ngut ki briew na sha lyndet kiba kyrshan ia ka UCIL ban tih ia u uranium ha Domiasiat.
Na ka liang jong u nongialam barim ka KSU u bah Daniel Khyriem, u la ong ba kane kadei ka sngi ban kyrsiew Ri kam dei tang ban kyrisew ia ki dkhot ka seng hynrei ban kysiew ia ki paidbah ka jylla ban iatylli ban long kawei na bynta ban iakhun pyrshah ia kino kino ki jingeh.
Katba na ka liang u bah Samuel B Jyrwa, u Chairman ka North East Social Organization (NESO), u la ong ba ka seng kan nym shah da lei lei ban tih ia u uranium na kane ka jylla namar kan pynjulor bad kan sa pynsniew ia ka mariang bad kan buh jingma ruh ia ka koit ka khiah.
