Bun ki khynnah skul ki udpang budlum ba khia palat kip la kot ujor ka KHNAM

Shillong, Nohprah 10: U KHNAM mynta ka sngi kala phah biang da ka jingthoh sha u myntri ka tnad pule puthi jong ka sorkar jylla ban ujor halor ka jingkhia palat jong kip la kot jong ki khynnah skul kiba dang pule ha ki klass kiba rit.

Na ka liang jong ka KHNAM kala ong ba kila dep ban thoh sha ka sorkar halor kane la bun bun sien hynrei haduh mynta na ka liang jong ka sorkar kam pat ai jubab ei ei ruh em halor kane ka jingthoh jong ka KHNAM, na ka liang jong ka KHNAM kala kwah ban tip aiu ka sorkar kala leh halor kane.

Na ka liang jong ka KHNAM kala kdew ba ka “Ministry of Human Resources Development’ katkum ka shithi No.D.O.No1-4/2018-IS-3, MHRD, New Delhi, kaba la phah ha ka 05.10.2018, kala bethah ia baroh ki sorkar jylla bad ki Union Territories ba kin shna kyndon halor kane bad ki sorkar jylla ki hap ban burom ia kane ka jingbethah.

La ong ba na ka bynta ki Klass I bad Klass II ki skul kim pat dei ban ai jingthoh ba kin thoh ha iing, ka jinghikai ka dei ban long beit tang ia ka ktien na ka bynta ki Klass I bad Klass II haduh klass V ki dei ban hikai ia ka ktien bad ia ka jingkhein.

Katkum ka jingkhein, ka jingkhia jong ka palat na ka bynta ki Klass I haduh Klass II ka long 1.5 kilo, Klass III haduh Klass V ka long 2 haduh 3 kilo, klass VII klass VII ka long 4 kilo, klass VIII bad IX ka khia 4.5 Kilo bad klass X ka jingkhia ka long 5 kilo.

Na ka liang jong ka KHNAm kala ong ba ka sorkar Maharashtra kala jurip ia kane bad la shem ba bun na ki khynnah ki udpang namar ka jingkhia palat jong kip la kot. Ia kane ka jingjurip jong ka sorkar Maharashtra la kubur ruh da ka tnad ka koit ka khiah la ong u Bah Thomas Passah President Youth Wing jong ka KHNAM.