Shillong, Nailur 22: U Dr D.R.L Nonglait president jong ka Khasi Author’s Society (KAS) ha ka jingkren kum u kongsan ha ka jingialang paidbah ha Madan Malki ban pynsngew sha ka Ri India ia ka jingdawa u paidbah Khasi ba ia ka ktien Khasi dei ban pynrung noh ha ka khyrngit kaba phrang jong ka Ri Synshar jong ka Ri India ha kaba palat phew hajar ki paidbah khasi kila ia wan na kylleng ka Ri Lum Khasi.
Ha ka jingkren jong u Dr Nonglait u la kynnoh, ba ka daw jong ka jingbym ioh rung ka ktien khasi ha ka khyrngit kaba phra ha kine ki snem kiba la leit noh wat la ka ktien khasi kala biang lut katkum ki kyndon kiba la buh da ka tnad kam poh iing jong ka Ri India ka dei na ka jingleh stieng jong ka sorkar jylla, u la kynnoh.
Ha kane ka jingialang paidbah u la ong ba na duh u snem 1978 ba la seng ia ka KAS, ka seng kala ia kynduh ia shibun ngut ki myntri rangbah ka jylla bad kum juh ia ki MP jong ka jylla hynrei kam shym poi sha ei ei sha ei. Ha kine ki snem baroh ka KAS ka ialeh da kaba ia kynduh ia ki heh sorkar, hynrei kam poi dei na kane ka daw ba ka seng ka hap ban shim ia kane ka lynti ban ia mih madan ban pynsngew sha ka sorkar jylla bad kum juh sha ka sorkar pdeng.
Dei ha u snem 2013 ka tnad kam poh iing jong ka Ri India kala pan jingshai na ka sorkar jylla bad kita ki jingkylli ki long hato ia ka ktien khasi la kren da palat san lak ngut ki briew, katkum ka khana samri jong u snem 2011 kiba kren ia ka ktien khasi ki long palat 14 lak ngut.
Ka la kylli hato ia ka ktien thoh kala don ne em 50 snem, ka ktien thoh ha ka ktien khasi kala dap 176 snem. La kylli ruh hato ia ka ktien khasi la hikai ne em ha ki skul bad College, ia ka ktien khasi la hikai ha ki skul naduh u snem 1842 bad mynta kala poi sha duh University, ka tnad kam poh iing kala kylli hato la kren ne em da kiwei ki briew ia ka ktien khasi, kumba ka long mynta la kren ia kane ka ktien da kiwei ki jaid bynriew ruh.
U Dr Nonglait u la ong ba dei ha u snem 2016, u myntri khynnah kam poh iing jong ka Ri India u Kiren Rijiju u la ongba ka jingpynrung ia ka ktien dei halor ka jingsngew jong ki paidbah bad kane ka jingialang paidbah mynta ka sngi ka dei ka jingsngew jong u paidbah khasi bad lada don kam ban leit iaid paidbah sha Delhi ruh ka seng ka la long kaba la kloi.
U Dr Nonglait u la ong ba ka ktien khasi kala biang nadong shadong, lada ka sorkar pdeng ka niew burom ia ki paid khasi ka dei ban pynrung noh ia ka ktien khasi ha ka khyrngit kaba phra jong ka Riti Synshar jong ka Ri India bad lada kam pynrung ka dei ka jingniew bein jong ka sorkar pdeng ia ka jaid bynriew khasi ha dien ba ka ktien khasi kala biang nadong shadong.
Halor ka rai jong ka sorkar ban wanrah ia ka Rai hapoh iing dorbar ban dawa na ka sorkar pdeng ban pynrung ia ka ktien khasi sha ka khyrngit kaba phra ka seng ka pdiang sngewbha bad ka dei ban long ruh kumta bad ha ka sngi ban rah ia ka ktien khasi sha Parliament kin pynlong ia ka jingiaid paidbah ha Delhi lada don kam, la ong u President ka KAS u Dr DRL Nonglait.
Kiwei ki nongkren ha kane ka jingialang paidbah ki long u Bah Samuel Jyrwa Chairman ka NESO, ka Dr A KHarmalki ba hikai ha NEHU, Dr SL Marbaniang ba la shongthait na ka kam hikai ha NEHU, Dr Bajibon Kharlukhi mp Barim ka jyll bad u Dr K Nongtdu principal ka College ha East Jiantia Hills District. Baroh ki nongkren kila pynsngew ba lada ka sorkar Indian kam pdiang ia kane ka jingdawa ki hap ban pyrkhat da kumwei pat kum ka jaidbynriew. Ha kane ka sngi la pynlong ia ka jingiaid paidbah na Madan Iewrynhep sha Madan Malki haba u Syiem jong ka Hima Nongkhlaw u Pa’im P Syiemlieh la long u kongsan ha kane ka sngi.
