Shillong, Nailar 29: Ka KSU Umrynjah Unit kala ïoh ban aiti noh ïaka jaka Leit bar paidbah sha ka Dorbar Shnong Umrynjah,hashwa ban aiti pura ïa katei ka jaka leit bar kala don shwa ka jingïalang ba lyngkot bad kumjuh ruh ruh ban pynskhem pura ïa kitei ki Samla ba wan pynïasoh thymmai sha ka Seng.
Ïaka jingïalang la pynïaid da u Samla Oswel Thabah uba dei u President jong katei ka shnat treikam uba ha kajuh ka por uba la shim ruh ïaka bynta ban pdiang sngewbha ïa baroh naduh u Samla Donald V.Thabah uba dei u General Secretary jong ka KSU Sengkmie bad kumjuh ruh uba long kum u Kongsan ha katei ka sngi,Bah Marcus Warjri Rangbah Shnong Umrynjah iba la long kum u Symbud Kongsan ryngkat ki wei kinongialam ka seng kiba la iadon lang.
Ha katei ka la ïoh ïaka jingkren na u Rangbah Shnong uba la pynpaw ïaka jingkmen kaba khraw ba kum ka Shnat treikam lyngba u President bad General kila wan ïa kynduh ïa u bad kila pynsngew ba ka Umrynjah Unit ha ryngkat ka jing kyrshan jong ka KSU Mawlai Circle ka don ïaka jingthmu ban pyntei ïa katei ka jaka leit bar namar kane ka mat kadei kaba la ju ïakren bunsien haki Komiti Shnong.
Na ka liang jong ka shnong kala pyrshang ruh ban pynsngew sha ki Nongmihkhmat Paidbah (MLA/MDC) hynrei kala shu kut kumto tang haki jing pynsngew,watla katta naka liang ka Shnong kala phai khmat sa sha u BDO jong ka Mawlai Block bad haba la ïakren bad u BDO ula pynshai bad pyntip sha ki ba haka ba ïadei bad katei ka jingïarap ïaki yn ym lah shuh ban ai lyngba ka Block namar ïa kiba kum kitei ki kam la shimti bad peit da ka tnat PHE.
kumta kala shu sahkut noh kumto,dei tad haduh ba ka KSU Umrynjah Unit kala wan pynsngew haki nongïalam shnong ba ki don kum katei ka jingthmu naka liang ka Shnong ruh khlem da pynslem kala ai ka jaka ïaki ba ki shna ïa katei ka jaka leit bar kaba shen yn sa plie noh ha kane hi ka sngi.
Ha ka jingkren jong u la pynkut ïaka jingkren jong u da kaba kyrkhu kyrdoh ïa baroh ki dkhot jong ka Seng ba kin nangsan haka pyrkhat pyrdaiñ haka ban pyn tyllun ïaki shalyntem treikam jong ka Seng haki sngi ki ïa ki ban nang wan naka bynta ki Dawbah jong ka Ri bad ka Jaidbynriew Hynñiewtrep hi baroh kawei.
Na ka liang ka Jylli la ïoh ïaka jingkren na u Samla Biangbor L.Paliar uba dei u President uba la pynsngew ba naduh ki sngi kiba ka Umrynjah Unit kala pynsngew ïa katei ka jingthmu jong ki naka liang ka jylli kala sngew dei ban ai jing kyrshan ïa kane ka shnat ba kan pyn urlong ïa katei ka kam bad ba kin ïaid shakhmat bad lada ki shem jingeh ka Jylli kala long kaba kloi ban don ha syndah jong ki.
Haba ïadei bad ki Samla kiba dang shu wan ïasoh thymmai naka liang u President u la pdiang sngewbha ïaki bad pynshai ïaki nongrim jong ka Seng bad ba kum kano ka lynti ki hap ban ïaid wei ba kila pynïasoh bad ka KSU,kyntang ïawai ula kitbok kitrwiang ïa baroh ki dkhot jong katei ka shnat ba kin dang lah ban trei khambha kum ka kynhun haka ban shakri ïaka dong ka thaiñ bad ki shnong ba marjan.
Hashwa ban aiti noh ïa katei ka jaka leit bar,ïaka bynta ba kongsan ha kaba ki Samla kiba wan pynïasoh thymmai kin shim ïaki kyntien kular katkum ka Riti treikam jong ka Seng la ïalam nakhmat da u Samla Donald V.Thabah General Secretary jong ka KSU Sengkmie uba la ai ruh ïaka jingkren jong u,naka liang jong utei u Samla ula pynkynmaw ba kane ka shnong ka don ka jingïadei kaba jan bha bad ka KSU naduh ka jing pyrshah ïaka jingwan survey jong Northeast Frontier Railway (NFR).
Naka liang utei u Samla Nongïalam u la pdiang sngewbha ïa kitei ki Samla kiba dang shen kila long ki dkhot ba pura jong ka KSU bad ban pyn kynmaw ba haba ki wan ban ïasoh bad ka KSU kim dei ban khmih lynti ïaka ïohnong shimet bad ba ka KSU kan ym don ka tyngka pliah ban siew ïaki hynrei ka bainong ba kan siew ka dei ban pynrung haki ïaka mynsiem ba kin ieid ïala ka Jaidbynriew.
Kum ki dkhot ka KSU ba kin kynmaw ba ka jingjaw syep,jingjaw snam bad ka jingjaw ki Ummat jong man uwei pa uwei u dkhot kan pynlong kum i jing jaw i barit i ban pynlong pat ïaka duriaw bah kaba mut manba kitei ki jing jaw na u dkhot jong ka Seng kin long pat ki jing myntoi ïala ka Ri bad ka Jaidbynriew.
Haba ïadei bad ka jing pynshna jong ka KSU Umrynjah Unit ïa katei ka jaka leit bar naka liang jong u Samla Donald u la ai ka jing ïaroh kaba shi katdei eh ïa katei ka shnat treikam namar kumba ka long wat ka Sorkar India ka don hapdeng ka jing ïakhun ban lait naka jingleit bar pathar.
kumba ka long ka jingleit bar pathar ka wanrah ïa shibun ki jait jingpang kiba long ka jingma ïaki khun bynriew,kumba ka long ka Seng hala i bor i barit ka la lah ban shim ïaka ba kum katei ka jing pyrkhat ban lait naka jingleh pathar haka ba leit bar ka la long ka nuksa ba ka Sorkar ka dei ban pynstet ïaka jingpyntreikam ïa katei ka Skhim lyngba ka Swatch Bharat Mission.
Ka Sorkar pdeng ba ka jylla jong ngi ruh kan lait noh naka jingleit bar pathar ( Open Defecation Free) khnang ba kan wanrah ïaka jingkhuid jong ki sawdong sawkun bad ba kan ym buh jingma haka koit ka khia ha ki sngi ki ba dang wan,la pynkut u Samla Donald ïaka jingkren jong u. La pynwai ïaka jingïalang da kaba aiti noh ïa katei ka jaka leit bar sha ka Dorbar Shnong Umrynjah.
