Shillong, Iaiong 17: Ka Executive General Council (GEC) kaba ar jong ka HYC kaba la long mynta ka sngi, kala shim ia ka rai ban dawa na ka sorkar ba ka dei ban buh noh ia ka ‘custom Tribunal’ kane ka long ban don ki nongbishar ban bishar ia ki riti ki dustur jong ki trai jylla, Khasi, Garo bad Jiantia. Lada ki paidbah muslim ki don ia ka ‘personal Law Board’ kam dei ban don jingeh ban buh noh ia ka tei ka Tribunal la ong u General Secretary jong ka seng u Bah Robert K Jahrin.
Kiwei ki jingdawa kiba ka seng kala shim mynta ka sngi ka long ba ka sorkar ka dei ban pynkloi noh ban pyntrei kam ia ka Inner Line Permit ha kane ka jylla ban khanglad ia ka jingwan rung kyrthep jong ki briew kiba nabar, bad lada ka sorkar kam pat lah ban pyntrei kam ia ka ILP ka dei ban pyntrei kam noh ia ka Residential Permit ha kaba ki briew kiba na bar ki hap ban da ioh jingbit shuwa ban wan shah bylla.
Haba ia dei bad ka Work Permit na ka liang jong ka HYC ka dawa ba ka sorkar ka dei ban don ia ka jingkhein kaba bniah ia ka jingdon jong ki briew kiba trei bylla, haba la don ka jingkhein lada shem ba ki briew jong ka jylla ki dang duna sa ai ia ka work permit hynrei lada la don dei ban ailad shuwa ia kiba la don ym dei ban shuai pathar, ka sorkar ka dei ban pynbha ia ka work permit.
Haba ia dei bad ka jingiakhaii benami, ka HYC ka dawa ba ka sorkar ka dei ban pynkylla noh ia kane , ha kaba ia ki skhai ym dei ban ai da nongkynnoh hynrei dei ban ai da u nongshah kynnoh ba u dei ban pynshisha ba u khlem trei benami.
Kiwei ki rai kiba ka HYC kala shim mynta ka sngi ka long ban dawa na ka KHADC ba ka dei ban kham pyrkhing ia ka jingai ia ka Trading License sha ki bar jylla, ka sorkar ka dei ban ialeh katba lah ban pynrung noh ia ka ktien khasi sha ka Eight Schedule, haba ia dei bad ka jingpynkylla ia ka Sixth Schedule ruh ka seng kala ia kren ha kane ka GEC.
Haba ia dei bad ka jingthep vote ka seng kala ia kren ban dawa ba ai ki nongthep vote kin thep sha la ka jong ka jong ka jylla lada ki khasi bas ah sha bar ka jylla kin hap ban wan thep vote sha la ka jong ka jylla trai jong ki bad kum juh ia kiwei ruh ba kin leit banthep vote sha la ka jong ka jylla jong ki.Ha kane ka jingialang ka seng kala shim ia ka rai ban pdiang ia u snem 1971 kumu snem ot kyrteng ia ki briew kiba nabar.
