Shillong, Jymmang 24: Ka KSU Delhi Unit ka pynpaw ia ka jingsngewsih bad jingsngewkhia ia ka jingjia kaba jia haka 23 tarik, u Jymmang, 2020 ha ka por 4.30 mynstep ha kaba iadei bad ka jingwan pynthut bad rung jubor jong ki briew na Bihar haka ka special train kaba don 90 ngut tam ki nong Meghalaya kaba mih na Haryana.
Ka jingshah pyndik ki khynnah jong ngi ka la jia naduh ka por ba ki nong Meghalaya kiba sahkut ha Gurgoan Haryana ki la shah pyntip haka Haryana Government ba ki hap ban leit screening sha Stadium, shi sngi shuwa ban mih ka rel, kane ka la wanrah iaka jingklumar namar khlem don ka jingpynbeit lypa ban wanshaw ia ki na ka jaka kiba ki don. Wat hapdeng kane ka kynrum kynram kaba pynkulmar ia ki briew, ka Nodal Officer IR Sangma ka khlem ai jingbatai (instructions) lane shim ia ki phone calls jong ki baroh.
Kane ka rel ka mih na Haryana, ha ka 22 tarik, u Jymmang, 2020 bad don kumba 90 ngut tam ki nong Meghalaya kiba wan phai. Ha kane kajuh ka sngi (22.5.2020) kumba 11:00pm la ioh jingtip ba i don iwei i khynnah kynthei iba la khlad noh hapoh kane ka rel iba dei na ka jylla North-East bad ha kane kajuh ka compartment la shong lai ngut kiba dei na Meghalaya.
Hamar ba ioh jingtip shaphang kane, iwei na ki volunteers iba na Meghalaya, ila pyntip mar mar sha ka Special Branch Meghalaya bad kumjuh ruh sha Covid Police Control room ba kin pyntip sha ki Railway Police Force. Hadien ba ka rel ka la sangeh ha Kanpur ha ka step kaba bud, ki pulit na kane ka jaka ki pynbor ia kito ki khynnah ban phah sei hi ia ka metiap shabar.
Hynrei kine ki khynnah Meghalaya ki pyneh. Ki pulit haba ki iohi ia kane, ki la pyllait noh ia ki. Hapdeng kane ka jingsangeh jong ka rel ha Railway Station, ki pulit kim shem la shah ia ki khynnah ban leit thied tang ia ka um dih ruh.
Ha ka juh hi ka sngi, la ioh jingtip lyngba u Vice President ka KSU Delhi Unit ba ki khynnah ki ioh iaka jingbam ba lah sinew bad ha ka step ka ba bud haba ka rel ka sangeh ha Danapur Railway Station Bihar ka la don ka jingshah pynthut na ka liang ki pulit ka railaway station bad ka la don ka jingthmu ban pynrung jubor ia ki briew hapoh ka rel, kane ka jingjia ka la pynrah mynsiem bad pynsyier iaki khynnah kynthei bad baroh ki nong Meghalaya kiba don hapoh ka rel.
Kat kum ka jingioh jingtip na U Vice President ka Delhi Unit ki la pyntip ruh sha ki bor ba dei peit, wat hadien jong kane ruh haka por 5.30 janmieit la don biang ka jing shah kawang maw iaka rel. Kane ka rel kaba mih na Gurgoan ka ban wan sha North East ka kit ka don ruh ia ki briew jong kane ka North East.
Na ka liang ka unit, ka kyrpad ia ki bor ba dei peit bad ia ka sorkar ba kan pynpoi ia kane ka khubor sha ka Ministry of Railway bad ruh ban ai bor pahara ia kiwei pat ki special train ki ban nang wanphai kum na Rajasthan, Andhra Pradesh, Maharashtra, Kerala bad kiwei pat.
Ka tnad kam pohiing jong ka Sorkar India kadei ban tuklar halor kane ka mat, khnang ba kan nym jia shuh kum kine ki jingjia ia kiwei pat ki ban dang wan. Kane ka long katkum ka kyrwoh kaba la phah da ka samla Marbiang Khongwir bad u samla Wallam K Nongsieh nongialam ka KSU Delhi Unit.
