New Delhi, Iaiong 09: U Myntri Rangbah duh ka ri, u Narendra Modi u la iakren bad ki Myntri Rangbah jong ki jylla bapher bapher mynta ka sngi halor ka jinglong jingman ka COVID-19 lyngba ka video conference.
U Myntri kam pohiing jong ka Sorkar Pdeng u la kren halor ki sienjam ba la shim da ka sorkar ha ka jingiakhun pyrshah ia ka khlam COVID. U la ai jingtip ruh halor ka jingiaid ka kam ai dawai ha ka ri.
U Health Secretary u la ai jingpynshai halor ka jinglong jingman ka khlam Covid ha ka ri, da kaba phaikhmat ha ki jylla kiba mad ia ka jingbun ki case mynta, bad u la ban ia ka jingdonkam ban pynjur ka jingleh ia ki test ha kine ki jylla. U la iasam ruh ia ki jingtip ba bniah halor ka jingpynmih ia u dawai bad ka jingpynpoi ha ka ri.
Ki Myntri Rangbah ki la ai khublei ia u Myntri Rangbah duh ka ri namar ka jingialam ha ka jingiakhun lang ia une u khniang jingpang. U la ai jingtip shaphang ka jinglong jingman ka khlam Covid ha ki jylla jong ki.
Ki la ong ba ka jingsdang ha ka por ia ka prokram ai dawai ka la iada ia bun ki mynsiem briew. La iakren ruh halor ki jingeh ba iadei bad ka jinglong artatien ia u dawai bad ka jinglehnohei ki dawai.
U Myntri Rangbah duh u la pyni ia katto katne ki jingshisha hakhmat ki Myntri Rangbah. Kaba nyngkong, ka ri ka la tam ia ka jingbun case Covid kaba mynshem snem bad ka jingkiew ki case ka la kham sted ban ia kaba nyngkong.
Kaba ar, bun ki jylla, kynthup ia ka Maharashtra,Chhattisgarh, Punjab, Madhya Pradesh bad Gujarat ki la tam ia ka jingbun ki case Covid kaba mynshem snem. Bun kiwei kiwei ki jylla kiba la jan sha kane kajuh ka bynta.
Kane kalong kaba sngewkhia bha, u la ong. Kaba lai, mynta ki briew ki la khein sting palat bad ha ki katto katne ki jylla wat ki bor pyniaid ruh ki la leh sting. Ha kum kane ka jinglong jingman, ka jingkiew ki case ka la wanrah jingeh shibun
Hynrei, u Myntri Rangbah duh u la ban, ba hapdeng ki jingeh, ngi la kham biang ki rukom ai jingiada na kane ka khlam bad mynta ngi la don ruh ia u dawai. Ka jingiatrei lang ki briew ryngkat ka jingtrei shitom ki doctor bad ki nongai jingsumar ka la iarap shibun ban tehlakam ia ka jinglong jingman bad ki dang iai bteng haduh mynta ia kane ka kam.
U Myntri Rangbah u la ong, “Ngi hap ban phaikhmat sha ka ‘jingtest, jingbuddien, jingsumar’, kiba long ki lad jingiada ba iadei bad ka COVID-19.” U Myntri Rangbah duh u la ong ba ngi dei ban peit bha ia ki briew kiba lah ban pynsaphriang ia une u khniang jingpang khnang ban tehlakam ia u khniang jingpang bad ka jingtest bad jingbuddien kalong ka bynta ba kongsan.
U Myntri Rangbah duh u la batai ba ka jingtest kalong kaba donkam ban lap ia ka jingpur ka jingpang ha ka imlang sahlang bad kumjuh ruh ban ithuh ia ki briew kiba lah ban pynpur ia ka jingpang. Donkam ban pynjur ka jingleh ia ki test man ka sngi da ka jing thmu ban pynduna ia ki case positive sha ka 5% lane duna.
U Myntri Rangbah duh ka Ri u la ong ba da kaba phaikhmat bad buh thong ban pynlong ka test ha ki containment zone bad ki jaka ba kham bun ki case. La ban ruh ban pynjur ia ka jingleh ia ki test RT-PCR sha kumba 70% na ki test baroh ba la leh da kaba kyntiew ia ka jingdon jingem ban pyndep ia ki test RT-PCR.
Da kaba iohi ba manla ki case positive ki don ka lad ban pynsaphriang ia u khniang jingpang sha kiwei ha ka jingbym don ki lad jingiada kiba biang, la iamir jingmut halor ka jingpynlong ia ka jingbuddien ia ki briew kiba iakynduh ia ki case positive kaba long kongsan bha ban tehlakam ia ka jingpur ka jingpang ha ka imlang sahlang.
U Myntri Rangbah duh u la ong ba dei ban buddien ia kumba 30 ngut ki briew kiba iakynduh ia ki case positive, ha kaba dei ban test bad pynsah kyrpang ia ki, khamtam hapoh ki 72 kynta ba nyngkong. Kumjuh ruh, dei ban kdew shai ia u pud u sam jong ki containment zone.
U Myntri Rangbah duh u la ong ba kam dei ban don kano kano ka jingkhein sting ha ki jingpyrshang jong ngi namar ka jingthait ban bud ia ki kyndon ba iadei bad ka Covid. U la bthah ruh ban bud ia ki SOP jong ka Tnat ka koit ka khiah jong ka Sorkar Pdeng ha ki containment zone.
U la ban ruh ia ka jingdonkam ban don ka jingtip kaba biang halor ki jingiap ryngkat bad ki jingpeit bniah. U la bthah ia ki jylla ban iashim bynta ha ki webinar ba la pynlong da ki AIIM, Delhi man ka sngi Ba ar bad sngi Thohdieng. U Myntri Rangbah duh u la kyrpad ia ki jylla ban ai dawai pura ia ki briew kiba la 45 snem shaneng ha ki district kiba bun ki case.
U Myntri Rangbah duh u la kyntu na ka bynta ka ‘Teeka Utsav’- ka rynsan ai dawai hapdeng ka 11 tarik Iaiong, kaba long ka lyngkhuh sngi kha jong ka Jyotiba Phule bad 14 tarik Iaiong, ka lyngkhuh sngi kha jong u Baba Saheb Ambedkar.
Ka jingpyrshang kadei ban long ban ai dawai katba lah ia ki briew ha kane ka rynsan ai dawai. U la kyntu ruh ia ki samla ban iarap ban pynioh dawai ia baroh ki briew kiba la 45 snem shaneng.
U Myntri Rangbah duh u la maham pyrshah ia ka jinglong thurmur, u la ong ba ngi dei ban buh jingmut ba hapdeng ka jingai dawai, kam dei ban don ka jingkhein sting bad dei ban bteng ban shim ia ki lad jingiada . Da kaba ban halor ka mantra ‘dawaibhi-kadaibhi’, u Myntri Rangbah duh u la ban jur halor ka jingdonkam ban ai jingtip shaphang ki rukom im kiba iada na ka COVID.
