Shillong,Naitung 04: Kum shibynta ban pynneh pynsah ia ka jingrwai tynrai khasi ban burom bad ban kyntiew ia ka sap ka phong jong ki nongieid jingrwai ha ka jylla u kaitor ba pawnam ka jylla u la seng ia ka Jingkieng Ksiar Fan Club (JKFC) mynta ka sngi 5 tarik u Naitung.
U Kaitor ba pawnam jong ka jylla u Bah Rana Kharkongor haba ia kren bad ki lad pathai khubor mynta ka sngi ula ong ba ka jingthmu ban seng ia ka Jingkieng Ksiar Fan Club ka long ban maitphang ban pynlong doh pynlong snam ia jingrwai khasi ha iwei pa iwei ki khun khasi kiba don ka sap rwai bad kane ka jingthmu ka long ruh kum shibynta ban kyntiew ia ki riew donsap ha kane ka kam. namar kumba ka long haduh mynta kiba ki kaitor ynda ki la iap noh na kane ka pyrthei ka sap jong ki ka kut noh tang ha ki bad ym don ba buddien ne pynim ia ka jingrwai jong ki.
Shuh shuh ula ong ba ka jingthmu ban seng ia kane ka club ka long ban ieid ban burom ban kyntiew ia la ka jong ka jingrwai khasi tynrai bad ban pynneh haduh ki pateng kiba nang wan namar kumba ka long mynta kiba bun na ki kaitor ynda ki la iap na kane ka pyrthei ka sap jong ki ka shu kut noh tang ha ki bad ym don ba bud dien ban pynneh pynsah ia ki jingrwai.
Kat dang mih ki sngi ki jingrwai khasi ki la shu rwai tynneng na ri sepngi ban pyniaid iew bad ban pynmih pisa ha kaba teng teng don na ki jingrwai kim long shuh ban ia sngap lang bad kiba ha iing ha sem ne bad ki khun ki kti,hynrei ki jingrwai ha ki por ba mynshuwa ki kaitor ki rwai ka dei shaphang ka jingieid,ka jingieid ia ka mariang kaba pynhun bad pynum ia ka mynsiem bad pynjem ruh ia ki briew kiba pang,la ong u Bah Rana.
Ia ka Jingkieng Ksiar la sdang nyngkong eh na ka audio, albums, video albums, compact discs bad hadien la shna ruh sha ki films ha kaba kat dang mih ki sngi kiba bun na ki jingrwai khasi ki la mih ban shna ia la ki jong ki thup jingrwai naduh ka snem 1982 ia ka thup jingrwai Jingkieng Ksiar la pynmih nyngkong eh bad haduh mynta baroh ki thup jingrwai ki long haduh kumba 27 ne 28 tylli,la bynrap shuh shuh u Bah Rana.
Ka club ka khot ruh ia ki riew ieid jingrwai ban long dkhot jong ka club da kaba pynrung kyrteng ialade na ka bynta ban kyntiew ia ka sap ka phong ha ka rwai tynrai khasi.
Ha kajuh ka por ka JKFC ka la pyntip ruh ka jingpynrwai ia ki jingrwai ia ka jong ka jingkieng ksiar ha ki Hotel, ki resturant bad FM Radio ki dei ban ioh jingbit na ka Club
Ka Club ka kyrpad ia ki paidbah ba kin kiar na ka jingkopi tuh ia ki jingrwai na namar kane ka pyntroiñ ia ka jingtrei shitom ki nongrwai.(SP News)
