Naduh 9th June, Ka NGT National Green Tribunal na Delhi ka la ai rai ban pynkit noh ia u dewiong u ba sah hapoh ar taiew, hynrei haduh mynta ka 1st August kam shem la lah ban pyn urlong ia kane namar na ka liang ka sorkar jong u Chief Minister Dr. Mukul sangma kam shim la lah ban pynbiang ia ki jingkwah jong ka NGT (National Green Tribunal). Kane ka jingleh jong ka sorkar jong, ka NGT (National Green Tribunal) kam banse ban pynduh noh ia kato ka committee ba la thung ha ka 9th U June, bad thung pat da kaba thymmai myn ha ka 1 tarik August.
Ia une u dewiong la tih ha kane ka jylla jongngi naduh ki 60 snem mynshuwa. Hynrei tang mynta ka sorkar jongngi ka dang tip ia kita ki ain tih dewiong ka ka ri India. Ka long kaba leh bein ia ka jaid bynriew jongngi, khamtam eh ia kito ki nongmih khmat kiba la rim bad kim shem tip ne shim khia ia kine ki jaid ain jong ka sorkar India. Balei ba u Dr. Mukul u sngap jar haduh katne, don ei ei mo ha lyndet kumjuh ruh balei kine ki nongmih khmat jong ngi ka Congress bad seng riewlum mynta ki shu long tang ki niang kohnguh.
Ha kaba iadei bad ka jingthung ia ki Committee hapoh ka State Government kan shu kut noh tang ha ka jingshah scrap ha ka Court khlem da lah ban pyntrei kam bha ia ki committee kiba la shah thung, bad ka long ka jinglehrain haduh katta katta ia ka jaidbynriew Meghalaya, namarkata ngi buh ka jingkyrpad sha ka Sorkar bad ia ka Committee dei ban khlieh lang da ki nongmihkhmat bad ki MLA ki riewshemphang ki riewtrei mon sngewbha kin mih madan ban pynsngewthuh ia ka jingbymsngewthuh bad jingbym kitkhlieh jong ka sorkar, lada ka sorkar ka duna ki Officer na ka bynta ban pyntrei kam ia kine ki committee kiba ka court ka la thung te balei phim thung ia ki Officer Khasi kiba la pass da ki lak ngut ha ka shisnem shisnem.
Lada kane ka committee kaba dang thung mynta ruh kam lah ban pynbit pynbiang hapoh katei ka por ba la buh da ka NGT (National Green Tribunal) la sngew ban ong ba kan bha ban pynduh pyndam noh ne kan bha ban nym don shuh kano kano ka committee kane ka long ka sien kaba ar ba ka NGT ka la thung na ka bynta ban peit ia ka jingshalan ia u dewiong u ba la don lypa ha ki stock.(SP News)
