Dawki, Kyllalyngkot 24: U myntri khynnah ka sorkar pdeng u ba dei peit ia ka tnad kam poh iing jong ka sorkar pdeng mynta u ka sngi u la buh ia u mawnongrim ban tei ia ka Integrated Check Post ha Dawki, hapoh jong ka West Jiantia Hills District.
Haba kren ha ka jingialang kaba la long ha tei ka jaka khappud bad ka Ri Bangladesh, u myntri jong ka sorkar pdeng u la ong ba don kam ban plie ia ki kad khaii bad ka Bangladesh ban kyntiew ia ka ioh ka kot jong kane ka dong shatei lam mih ngi jong ka Ri India.
U la ong ba wat la kane ka dong bad ka thian ka long kham jngai na ka dewbah jong ka Ri India, hynrei 95% ki khappud jong kane ka thain ki ia jan bad ki Rib a marjan bad kane ka long ba ka Ri India ka don hap ban ka jingiajan bad ki Rib a marjan da kaba don ka jingiasngewthuh jingmut bad kine ki Ri ha ka khaii pateng.
Ia kane ka Integrated Check Post (ICP) yn tei da ka Land Port Authority jong ka Ri India bad kane ka jaka ka heh kumba 22 akar bad kane ka jaka kan long ka kad khaii pateng kaba biang katkum ka jingdon kam ha kane ka juk ba mynta bad kane kan iarap ha ka leit ka wan jong ki paidbah bad kan iarap ruh ha ka lad ioh kam ioh jam jong ki khun samla ia ka jylla bad kane ka thain. Ia kane ka jingtrei yn pyndep ha u bnai Nailur 2018.
Kiwei kiba la don lang ha kane ka sngi ki long u Bah Vincent H Pala MP jong ka Shillong, u Bah HDR Lyngdoh myntri kam poh iing ka jylla, u High Commissioner jong ka Ri India ha poh jong ka Ri Bangladesh u H V Shringla lem bad ki heh na ka Land Ports Authority jong ka Ri India.
