Shillong, Nailar 10: U Myntri Rangbah ka jylla u Conrad K Sangma u la iathuh ba ha ka jingialang jong ka kabinet kaba la long mynta ka sngi kala shim ia ka rai ban pynheh ia ka “Meghalaya Contingency Found” na ka T.305 klur tyngka kaba la pdiang ha u snem 2017 sha ka T.505 klur tyngka.
Haba kren ha ki lat pathai khubor u myntri rangbah ka jylla u la ong ba ka jingshim ia kane ka rai ban pynheh ia ka MCF ka long ba kaei kaba ka jylla ka don mynta ka long kaba rit namar ka lah ban pdiang tang T.505 klur tyngka, ka jingwan jong ka pisa na ka bynta ki kshim pynroi ha ka jylla kala dang heh kumta la pynkiew noh sha ka T.505 klur tyngka.
Ha kane ka jingialang kaba la long mynta ka sngi la shim ia ka rai ruh ban wanrah ia ka jingpynkylla ha ka “Financial Rules Services” ia kaba la wanrah ha u snem 1984, ka jingwan rah ia kane ka jingpynkylla ka long ban ai bor ia u Director ka tnad ri mrad ban kyntiew ia ka ram pynmih dud ha ka jylla.
Ha kane ka jingialang la shim ia ka rai ruh ban phah ia ki myntri sorkar bad kiwei ki heh sorkar ban pynher ia ka lama jong ka Ri India ha ka sngi rakhe ia ka jinglait jong ka Ri India ha ka 15 tarik mynta u bnai.
