Shillong, Iaiong 05: U O.P Upadhyay Inspector General jong ka Meghalaya Frontier u la ia shim bynta ka jingialang kaba la khot da u myntri rangbah ka jylla u Conrad K Sangma ha ka sngi thohdieng ha ophis treikam.
Ha ka jingiakynduh na ka liang jong u heh jong ki shipai BSF u la ai khublei ia ka sorkar jylla kaba la kloi ban ia treilang bad ia khun pyrshah ia ki kam sniew ha khappud bad ka Bangladesh bad kumba ka long mynta ka don ka jingiatreilang ha ki kam syntiat.
Ha kane ka jingiakynduh na ka liang jong u myntri rangbah ka jylla u la pynsngew ia ka jinglong jingman ha khappud bad ka Bangladesh ha ki bynta jong ka jylla Meghalaya ban khanglad ia ki kam sniew bad u myntri rangbah u la pynpaw ia ka jingkor dor ka jingdon jong ki ha khappud ban ai ka jingshngian ia ki paidbah nongshong shnong.
U myntri rangbah ka jylla u la ban jur ban don ka jingiatreilang ha pdeng ki BSF bad ki bor jong ka sorkar jylla ban pynneh pynsah ia ka shong suk shongsain ha ka jylla bad la ia kren ban don ka jingiatreilang ha pdeng ki bor syntiat ha kane ka jylla.
Na ka liang jongu heh ki shipai BSF u la pynpaw ia ka jingkut jingmut jong ki BSF ban iada ia u pud u sam bad ha ka juh ka por ban pynneh pynsah ia ka shong suk shong sain bad ban iada ia ka Ri ha khappud.
