Shillong, Kyllalyngkot 27: Ryngkat bad ka Ri India baroh kawei jylla Meghalaya ruh kala rakhe ia ka 70th Republic Day ha kylleng ki bynta jong ka jylla ha pdeng ka jingshongkun ha kaba ki paidbah kila ia tuid ban ia shim bynta lang ha kane ka sngi kaba khraw jong ka Ri namar dei ha kum kane ka sngi ba Ri India kala ioh ia la ka jong ka Riti Synshar jong ka Ri.
Ha nongbah Shillong, ia ka lama jong ka Ri India la pynher da u Lat jong ka jylla u Tathagata Roy, ha Tura ia ka lama jong ka Ri la pynher da u myntri rangbah ka jylla u Conrad K Sangma ha kaba u la ai ia ka khusnam Pa Togan N Sangma sha u Rev. George Mamalassery DD ha kaba ia dei bad ki kam trei mon sngewbha.
Ia kane ka jingleh burom ia ka 70th Republic Day la rakhe ruh ha Williamnagar ha kaba u myntri ka tnad PHE u bah Samlin Malngiang u la pher ia ka lama jong ka Ri India, ha Ampati u Bah AL Hek mytnri ka koit ka khiah, ha Resubelpara, U bah Hamletson Dohling myntri kam pynroi sor, ha Baghmara u bah Kyrmen Shylla ba dei peit ia ka tnad social welfare.
Ha Jowai u Bah Lahkmen Rymbiu myntri ka tnad pule puthi ka jylla, ha Khliehriat u bah Comingone Ymbon myntri ba dei peit ia ki kam ri dohkha, ha Nongstoin u Bah Metbah Lyngdoh myntri kam shangkai pyrthei, ha Mawkyrwat myntri kam poh iing u James K Sangma, ha Nongpoh u bah Sniawbhlang Dhar myntri ba dei peit ia ka kam kit kam bah.
Ha Sohra Civil sub Division, u Lambor Malngiang Chairman ka State Planning Board, ha Mairang u bah Banteidor Lyngdoh myntri kam ialehkai, ha Dadenggre u bah Renikton Lyngdoh Chairman ka MIDC, ha Amlarem u Marcuise N. Marak chairman ka MREGC, ha Pynursla u Gavin Mylliem chairman ka MKVI, ha Mawshynrut u Deputy Speaker u T D Shira, Raksamgre u Benedic R. Marak Co-Chairman SPB, ha Chokpot u Saleng A Sangma Cahirman ka SGPIMC, ha Ranikor u Bah Macmillan Byrsad Chairman ka MSLC bad ha Patharkhamah Adminstrative Unit u bah W Shylla.
