Shillong, Naitung 18: Ka elekshon ban jied president ha ka Ri India kala long mynta ka sngi, ha Meghalaya ia la elekshon la pynlong ha Assembly ha Rilbong, na ki 60 ngut ki MLA kiba la poi ban thep vote ki long 56 ngut bad 4 ngut ki MLA ki Khlem poi thep vote, na ki 3 ngut ki MP ba thep vote ha Shillong wei.
U Chief Electoral Officer u bah Fredric R Kharkongor ha dien bala kut ka jingiathep vote la iathuh ba ki MLA kiba wan thep vote ki long 56 ngut, kiba pep ki don saw ngut, na ki 3 ngut ki MP jong ka jylla ba wan thep vote ha Assembly 1, baroh kiba thep vote ban jied President ki long 56 ngut ki MLA 1 MP baroh 57 ngut.
La iathuh ba ia ka synduk thep vote kaba la khang bah bad tah laha mynta ka miet yn buh ha ka kamra kaba kyrpang bad bad la shai ka sngi un sa rah sha Delhi ryngkat ka jingpahara kaba khlain ban pynpoi sha Lok Sabha bad ka jingniew vote kan long ha ka 21 tarik mynta u bnai.
Haba ia dei bad ka jingbym poi ki saw ngut ki MLA na ka liang jong u CEO jong ka jylla Meghalaya la ong ba na ki daw kiba ym lah ban kiar, kiba khlem poi thep vote ki long u bah Sniawbhalang Dhar, bah Shitlang Pale, u James K Sangma bad u Marthon Sangma.
Ha kane ka elekshon President mynta ka kynti ki don ar ngut ki kyrtong ka Droupadi Murmu bala pynieng da ka NDA na ka liang synshar bad u Yashwant Sinha bala pynieng da ka liang pyrshah UPA.
