Shillong, Iaiong 04: U Dr. Debmalya Bhattacharya u Pro Vice Chancellor jong ka Maharashtra Institute Technology University ha Meghalaya la pyntip ba ia ka jaka ai jinghikai kaba pura kaba la tip kum ka “Permanent Compus” jong ka skul bah yn plie ha u bnai Jylliew 2024 kaba don ha Mawkasiang.
Haba kren ha ki lat pathai khubor mynta ka sngi ha Shillong Press Club la ong ba kane ka skul bah jong ki riewshimet la pynlong katkum ka ain kaba la pdiang da ka iing dorbar jong ka jylla Meghalaya ha snem 2011 bad ha u snem 2017 la pynkylla noh ia ka kyrteng sha ka Maharashtra Institute Technology University da ka iing dorbar thawain ka jylla.
Dei ha u snem 2021 ka skul bah kala ioh ban thied san akar ka jaka ha Mawksiang ha ka kyrteng jong ka skul bah, na ka liang jong ka skul bah ka ai khublei ia ki bor shnong, ka sorkar, ka tnad bad khyndew, ka tnad jong ka sorkar jylla kiba la ai ka jingkyrshan ia ka skul bah ban ioh ia ka jaka ban tei iing ki iing ki sem ban pynlong ia ki jinghikai.
La iathuh ba ka skul bah kala pynlut palat T.100 klur ban tei ia kitei ki jaka pule bad kane ka dei ka bynta kaba nyngkong, ha ka bynta kaba ar kin sa shna ia ki jaka sah jong ki samla pule jong ka skul bad ka bynta kaba lai kin dang pynheh shuh shuh ia ki jaka pule.
Na ka liang jong ka skul bah ka sngewthuh ba lada kam don laka jong ka jaka pule ba pura kin nym lah ban ioh ia ka jingshaniah na ki paidbah hynrei mynta kila ioh ia ka jaka ai jinghikai kaba pura ki paidbah kim dei ban don ka jingartatien ia kane ka skul bah wat la ka dei kaba la pyniaid da ki riew shimet.
Ha kine kis nem kiba la dep kila plie ia ka jaka pule ha Pohktieh ha kawei ka iingwai bad ki don tang kawei ka tnad pule bad ynda kila plie ia ka jaka hikai ba pura kin sa sdang noh sa san tylli ki wei pat ki tnad pule bad kin sa dang pynbun shuh shuh ia ki tnad pule, la ong ba ki jinghikai kin long ba ki samla kin ioh kam da dep pule.
La ai nuksa ba ia ka jingpule ha ka Degree kan long saw snem lai snem ban pyndep ia ka degree bad shisnem yn hikai ia ki samla ba kin pynkhreh ia ka eksamin UPSC bad MPSC ba kin lah ban pass ia ki eksam ban ioh ka sorkar, la ong ba kin ialeh ban thung ia ki nonghikai na kane ka jylla bad ia kiba ym ioh na ka jylla yn khot na shabar.
