Shillong, Jymmang 30: Ka jingpynkylla ia ka pisa da ka sorkar pdeng kala long ha ka 8th Naiwieng 2016 ha kaba la bethah ia ki paidbah ba kin leit ban thep ia ka pisa rim ka jong ki sha ki Bank khnang ba kin nym duh ei ia ka pisa.
Ha kane ka jylla Meghalaya ruh ki paidbah kila ia leit ban thep ia ka pisa jong ki sha ki Bank ia ka kot 1000 tyngka bad kot 500 tyngka ban lait na ka jingduh ei ka pisa jong ki, don kiba la thep kyndiat bad don kiba la thep shibun katkum ka jingdon ka jong ki.
Ha kine ki sngi na ka liang jong ka Income Tax jong ka sorkar pdeng ka la phah ia ki shithi sha baroh ki briew kiba la thep bun ha pisa ha katei ka por ba kin hap ban leit jubab sa ka Income Tax da kaba pyndap ia ki phom kiba la pynkhreh da katei ka ophis.
Ka Kong W.P Syiem Income Tax Officer (ITO) haba kren ha u SP News Agency kala ong ba kito kiba ioh ia ki shithih na ka Income Tax kim dei ban tieng, ki dei ban leit mih sha katei ka ophis ban ioh ban pynbeit ia kane ka jingpan jingpynshai na ka tnad Income Tax, hynrei kaba eh lada kim leit kin sah dian kuna.
La ong ba na ka liang jong ka tnad Income Tax kala shu phah ia ki shithi sha baroh kito kiba la thep pisa palat bad kane ka jingphah kam mut ba ki hap ban siew iaka khajna hynrei la da ki leit kin ioh ban pynbeit ban pynhsiah ba ki dei ki riewlum ba kim don kam ban siew ia ka Income Tax.
