Shillong,Nailur 27: U Myntri Rangbah ka jylla u Conrad K Sangma mynta ka sngi u la pyntip ba haba kut jong u bnai Risaw ki Eroplane kin sdang iaid beit na Delhi sha Shillong bad na Shillong sha Delhi.
Ia kane u myntri rangbah u la kren ha ka jingiashim bynta ha ka jingiakren ha ka “World Tourism Day” kaba la pynlong da ka sorkar pdeng ka DONER bad ka phang kaba la buh mynta u snem ka long “Emerging Delightful Destinations”, bad ki kam shangsuwari ka dei kawei kaba la kyntiew ia ka ioh ka kot ki briew.
Ka North Eastern Council bad ka DoNER ka juh pynlong ia kane ka jingrakhe man la u snem ban kyntiew ia ki kam shangsuwari ha ki bynta bapher bapher jong ka Ri India bad kum juh ka ia dang shatei lam mih ngi jong ka Ri India, ia kane ka jingialang mynta ka sngi la plie bad pyniaid da u myntri khynnah ka sorkar pdeng u Dr Jitendra Sing ba dei peit ia ka DoNER.
U Myntri Rangbah ka jylla ha ka jingkren jong u la ong ba ka jylla Meghalaya ka don ia ki jaka kiba itynnad, ki khlaw ki kshaid, ki krem, ki mrad khlaw bad ki syntiew ki skut bad kum ki jaka bala kham paw kum ka Sohra, Mawlynnong bad ka Nokrek.
La iathuh ba katkum ka jingkhein kaba la shim ha u snem 2019 ki briew kiba la wan sha kane ka jylla Meghalaya ki long kumba khatar lak ngut bad kane kala ai kam ia kiba bun ki briew la ka long ha ka kam ne kiwei kiwei ruh bad kum ba ka long ka jylla Meghalaya ka dei ka jylla kaba khring bha ia ki nongwan shang suwari ban ia nujor ha pdeng ki jylla ka dong shatei lam mih ngi.
U Myntri Rangbah u la ong ba na ka daw jong kane ka khlam COVID-19 kane ka kam shang suwari kala ktah shi katdei eh, ka sorkar kala pynkhreh kumno ban pynim biang ia kane ka kam hapoh ka jylla. La ong ba ki briew na kane ka Ri India ki mih ban leit kai palat ia ka 26 lak ngut man la u snem bad kane ka dei ka lad ban khring ia kine sha ka jylla Meghalaya.
Ka sorkar kala shim ia ka rai ban khring ia ki nongwan bei pisa sha ki kam jngohkai pyrthei bad kane kan long wat sha ki nongkyndong khnang ban kyntiew ia ka ioh ka kot jong ka jylla bad khamtam eh ia ki briew ba kan long kawei na ki lat kamai.
Haba kren halor ka leit ka wan u myntri rangbah ka jylla u la iathuh ba ha ba kut jong u bnai Risaw kan sdang noh ia ka jingiaid jong ki Eroplane na Delhi sha Shillong bad Shillong sha Delhi bad kane kan iarap ban kyntiew ia ki kam shang suwari bad ha dien ka bud kan don ruh kaba na Mumbai bad Hyderabad, u la ong.
