Shillong, Naitung 04: Kular bad mynjur Ki heh ka tnad BSNL ban pynbeit pyntikna ban pynbha da kaba shim khia ban thaw lad ban wanrah ia ka jingtreikam jong ka BSNL mobile CellOne, ha ki thain West Khasi Hills, Ri-Bhoi District, Jaintia Hills District, bad kiwei kiwei ki jaka kiba khapud Assam bad Bangladesh.
Ia katei ka jingkular la ai ha ka 3 tarik July 2014, ha ka jingiakynduh, u Bah John F Kharshiing, Co-Chairman, Meghalaya State Planning Board, & Grand Council of Chiefs of Meghalaya, Spokesperson, Federation of Khasi States, bad u Shri. M. J. Chrisostom, Senior General Manager BSNL Meghalaya Telecom District, Shillong hapoh office treikam jong ki ha Barik.
Ha katei ka jingialang la ia don lang ryngkat ki officer kiba bun jong ka BSNL. Kane ka jingiakynduh ka dei ka jingbuddien ia ka shithi na ka liang u Co-Chairman, MSPB, naduh u March 2014, namar ka jingleit jurip na ka liang ka State Planning Board ia ki C&RD Block kiba bun kum ka Mawshynrut Block, Nongstoin Block, Mawthadraishan Block, Mairang Block, (West Khasi Hills ) Laskien Block (Jaintia Hills), Mawryngkneng Block (East Khasi Hills) bad kiwei kiwei, ha kaba ki Block Development Officer(BDO), ki la pynpaw ha u Co-Chairman, MSPB, ia ka jingeh kaba ki shem namar ka jingtlot ka internet bad ki jingbym long ka line cellone ha kiba bun ki jaka kyndong.
Na ka liang u General Manager, BSNL, Meghalaya, u la pynpaw ia ki jingeh namar ka jingtrei torti ki contractor jong ka National Highway (NHAI) kiba la shu mait naphang ia ka surok bad ki cable sainar kiba rem dor jong ki ha baroh ar liang katta sha ka lynti Shillong – Guwahati bad Shillong – Nongstoin. Na ka liang ka BSNL ki la kyrpad ia u Co-Chairman, ban iarap ia ki ban ioh pyndonkam ia ki line electric jong ka MeCEL katba ki contractor kim pat dep shna ia ka National Highway( NHAI) sha Nongstoin.
Halor ka jingduna wat ha sor teng teng ka signal jong ka BSNL u heh BSNL u la pyntip ha u Co-Chairman, MSPB, ba ka long teng teng namar ki bat ia ka ain halor ka jingpynduna ia ka bor ‘range’ katkum ka jingbthah ba nym palat ka radiation katkum ka AIN. U la ong ba kum ka company Sorkar ki bat beit thik ia kitei ki ain.
Shuh shuh u la ong ba halor ki jaka kiba la kdew u Co-Chairman, MSPB kin sa pyrshang katba lah ban thaw lad ban pynpoi ia ka line /tower cellone hapoh saw bnai, hynrei ki la kyrpad biang ia u Co-Chairman ban iarap lem ha kaba iadei bad ki jaka pynieng ia ki tower, ban ioh ia ka jaka kaba don ha jan ka bording bad kiwei kiwei ki jingeh kiba ki iaishem na ka por sha ka por.
Ka jingialang ka la kut da kaba rai ban ia kynduh biang ha shen ban buddien ia kitei ki kam.(SP News)
