Halor ka NGT, ther ka AJYWO ia ka sorkar Meghalaya

Jowai, Nailar 03: Ki paidbah ba la shah ktah na ka jingkhang tih dewiong jong ka NGT  ha ka jylla Meghalaya khamtam kito kiba im kyndoi jakpoh  na ka ba bylla ha ki kam dewiong mynta ki don ha ka jingkordit bah halor ka jingiaibteng jong ka National Green Tribunal ban pynjari ia ka jingkhang tih bad shalan dewiong ha ka jylla Meghalaya.

Ka jingkhmih lynti jong ki bapli ki paidbah kup shilliang sem shilliang  ki bym tip ei ei shaphang ka NGT bad ki kam jong ka, ka long ba ha kane ka 1 tarik mynta u bnai kata ka NGT kan pyllait  noh ia ka jingtih bad shalan dewiong ha ka jylla lyngba ka jingiasaid jong ka sorkar Meghalaya ha khmat jong ka, hynrei phew se kane kam shym la long kumba la khmih lynti bad mynta ka kordit bah ka ap ia ki ba pli kito baroh kiba im kyndoi jakpoh na ka ba ioh bylla ha ki kam dewiong.

“Ka AJYWO ka pynrem jur iaka committee ba la thung da ka NGT ha ka 9 tarik u bnai ba la dep kaba ha ka jingshisha ka la dei ban pyndep noh ia la ka jong ka kamram kat kum ba la bthah da ka NGT bad na ka bynta ban ioh ban pyllait noh ia u dewiong u ba la dep pynmih sha lum bad lada kane kan jia katno kan long ka jingkyrkhu ia u paidbah jong ka jylla u ba im jakpoh na u dewiong. Hynrei kane ka committee kam shym trei ia la ka jong ka kamram kat kum ba la bthah ia ka bad mynta ki paidbah ki hap ban mad ia ka jingshah thngan bad ka jingiap na ka daw jong ka jingbym ioh kam ioh jam shuh”, ong u bah MH Dkhar President jong ka AJYWO Sengkmie.

Ka AJYWO ka pynrem jur ruh ia ka sorkar Meghalaya halor ka jingbym shim khia jong ka ban wad ia ki lad ki lynti ban pyllait noh ia u paidbah u ba im ja na ka ba bylla dewiong, na kane ka jingjynjar bah kaba la wan tap tyllep ia u na ka jingkhang tih bad shalan dewiong jong ka NGT. “Lada ka sorkar Meghalaya ka la shim khia ia kane ka jingkhang tih bad shalan dewiong ha ka jylla  kan jin da la bthah ia ka committee kaba la thung da ka NGT ban pyndep noh  wut wut ia ki kamram jong ka kat kum ba la bthah ia ka bad u paidbah ba pli ruh un jin da la ioh ban pyniaid biang ia u dewiong ba la dep pynmih lypa mynta sha jrong lum naduh u bnai ba la dep,” ong shuh shuh u Bah MH Dkhar.

U Bah M H Dkhar u la bynrap shuh shuh da ka ba ong ba wat ki nongmihkhmat paidbah (MLA) ruh kiba mihkhmat ia ki paidbah jong ka jylla na ki thain kiba don u dewiong ruh imat kim shym la trei da ka ba tyngeh shisha ban iarap ia u paidbah bapli u ba la shah ktah jur na kane ka jingkhang tih bad shalan dewiong jong ka NGT. “Kane ka thew shai ba lada kane kan long kumne, ki paidbah kin sa shah shet kylla  ha la ki jong ki nongialam kiba ki la jied shisien ka sngi”, ong shuh shuh u tei u nongialam jong ka AJYWO.

“Ka jingioh jong ki bor ba nabar ban tuklar ia ka kam tih bad khaii dewiong kaba leh mynta la baroh shi katta ha ka jylla Meghalaya, ka dei ka jingleh lyndet hi jong ka sorkar Meghalaya ia la ka jong ka jylla. Mynta la 43 snem ba ngi la ioh ia la ka jong ka jylla, wat tang iwei i jingpruid dak ruh iba ka sorkar kan bthah ia ki nongtrei dewiong da ka ban ym ktah ia ka mariang ruh ym ju don hi koit haduh mynta. Hynrei ka sorkar Meghalaya ka la iohthiah lyngngai bad kam ju pyrkhat ia ka lawei jong ka jylla la baroh shi katta. Mynta ba ki paidbah jong ka jylla ki la poi ha ka jingjynjar sat, ka sorkar ka dei ban shim ia ka jingbah khlieh” pynkut u Bah M H Dkhar.(SP News)