Shillong, Lber 18: Ka la mih ka khubor mar sien dep ka Exam SSLC ba bun ki khynnah kiba ialeh ia ka SSLC Exam mynta u snem 2024 ki la shah shet pluk ha ka subject Social Sciences kaba khynthup ia ka History bad Geography mar 23 marks.
Ka Civics bad Economics pat mar 17 marks nalor ka 20 marks ka Internal Marks bad 4 marks pat ka Map katkum ka Blue Print ba la ai copy da ka MBOSE sha baroh ki skul ha u snem 2018.
Hashwa jong u snem 2018,kata, naduh ka snem 2008, ka MBOSE ka la phiah ia ki jingkylli la ki jong ki jong ki subject ba ki khynnah ki dei ban jubab,kata, ki khynnah kidei ban jubab beit ia ka History,Civics kiba hap ha ka Social Sciences I bad ka Geography bad Economics kiba hap ha ka Social Sciences II kin thoh la ka jong ka jong ka subject.
Dei ha ka snem 2018 ba ka MBOSE ka la pynkylla noh ba kin don noh ki jingkylli ban shu jied ki khynnah ia kiba dei ne Multiple Choice Questions (MCQ) kiba kit shi mark kawei ka jingkylli bad ki Short Answer(SA) kiba kit 2 marks kawei ka jingkylli.
Kitei ki jingkylli baroh 2 jait dei ban khleh lang ia baroh 4 subjects bad ki khynnah kidei ban jied ne jubab tang 12 tylli na kawei -pa-kawei na kitei ki jingkylli.
Hynrei ki Long Answer pat ki khynnah kidei ban jubab beit la ka jong ka jong ka subject, kata, mar 3tylli na ka History bad Geography bad mar 2 tylli pat na ka Civics bad Economics. Kane ka rukom leh kan kham pynsuk ne iarap ia ki khynnah ba kin ioh jied khnang ba ki lah ban kham pass bha.
Haba phai pat sha jingkylli jong ka Social Sciences jong mynta u snem 2024,ki jingkylli na ka Social Science I u ne ka nongset jingkylli um, kam da pynpher palat ne leh stad eh haduh katta katta lait noh katto katne.
Hynrei ia ka Social Science II Geography bad Economics) u/ka la wanrah ka rukom set jingkylli kaba iapher bak-ly-bak na ka rukom set jingkylli kaba mynshwa.
U/Ka la iaid lait ia ka nuksa jingkylli(sample questions) jong ka MBOSE ba dei ban kham bun ki jingkylli ban set na ka kot pule(Text book) jong ki khynnah bad tang khyndiat eh ki jingkylli dei ban pynpher tang ban ithuh ia ki khynnah ba proh jabieng(talented students).
Lada shu pynpher lut ia ki jingkylli,kata,ki set tang ia ki proh jabieng khlem pyrkhat shuh ia ki khynnah ba shu pdeng bad ki khynnah ba kham duna. Ha kamra class,kin don eh 10/15 pc ki proh jabieng karba 90/80 pc kidei ki average bad below average students.
Kidei kine kein kiba kylla ‘langknia namar kim lah ban thoh ne jubab hi na la ka jingstad lade. Wat lada set jingkylli thik na copy ne na kot pule jongki ruh,bun kim lah bad bun kiba fail.Katno tam lei lei lada pynpher ia ki jingkylli na kiba la ai.
Hynrei, kiba kham shah ktah eh ha ka Social Sciences mynta u snem 2024 kidei ki khynnah bym leit skul kiba ju shaniah ia ki jingkylli barim bad ki shaniah ruh ha ki help book kiba ki thied na iew na hat . Kine kin long ki ‘langknia ba shyrkhei ia ka subject Social Science mynta u snem 2024.
Nangne shakhmat,lada ka MBOSE ka kwah ban pynkylla ia ki rukom set jingkylli,ka dei ban ai jingtip sha baroh ki skul khnang ba kin tip ban hikai ia ki khynnah ha classroom katkum kata ka model jong ka rukom set jingkylli, ym ban shu set karba mon katba kwah.
Bun ki nonghikai ki dang hikai da ka rukom set jingkylli kaba rim ha une u snem 2023 ba la dep namar ym pat don satia kano kano ka jingpyntip thymmai kaban pyniap noh ia ka system kaba ju leh.
Lada ka MBOSE ka iai mlien ban iaid lait ia ki kyndon(guidelines/criteria) ba ka la bthah hi, kata,kan kylla long ka nongpyniap ba jar jar namar kin nang jur shuh shuh ka jingpep skul shiteng por jong ki khynnah.
Nalor ba ka Meghalaya ka la poi lypa sha trai ha ka liang ka thoh ka pule ha ri India, nangne sha khmat kan sa kham hiar shuh shuh wat ia ka Bihar kaba dei ha state kaba poi sha trai duh.
Ym tang kumta,hynrei nangne sha khmat, bun ki skul ha sor bad wat ha nongkyndong ruh kiban leit pyniasnoh noh sha ka Central Board kum ka CBSE/ICSE,etc kumba pyniasnoh lem kiwei ki skul kum ka Pine Mount School, BK Bajoria, Army school nalor bun bah ki central schools kiba don ha state jongngi. Dei hangta kein ba ka lah ban ktah mationg ia ka burom ka ijot jong ka MBOSE hakhmat ki ri India hi baroh kawei.
