Shillong, Jylliew 20: U Myntri rangbah ka jylla u Conrad K Sangma mynta ka sngi u la leit sha Tura ban jurip hi da lade ha kaba ia dei bad ka jingkhi ka jingpang “Japanese Encephalitis” ha Tura kaba la ktah ia ki 13 ngut ki briew hapoh katei ka jaka.
U Myntri ka koit ka khiah u Bah AL Hek haba kren ha ki lad pathai khubor mynta ka sngi u la iathuh ba u Myntri rangbah ka jylla u la leit hi da lade ban leit peit ia kiba pang ha ryngkat ki doctor na kane ka nongbah Shillong hapoh ka jingialam jong u Joint Director.
Na ka liang jong ka sorkar kala phah ia baroh ki tiar ki tar bad ki dawai ba shim ban ai ka jingsumar ia ki briew ha katei ka thain kiba ngat ha kane ka jingpang, ka sorkar kala shem ia baroh ki lad ki lynti ban ai ka jingiada ia ki briew ha Tura.
Ha ka juh ka por na ka liang jong ka sorkar kala bethah ia baroh ki ophisar kiba don hapoh jong ka tnad ka koit ka khiah ba kin bethah ia ki paidbah kumno ban iada na kane ka jingpang wat ha ki jaka kiba khlem pat shah ktah.
U myntri ka koit ka khiah u la dep ban khot ia ka jingialang ha kaba ia dei bad kane ka jingkhi kane ka jingpang bad ki ophis ka tnad ka koit ka khiah ha kaba la bethah ban shim ia baroh ki lad ki lynti kumno ban iada ia kane ka jingpang.
Ha ka juh ka por la bethah ia ki paidbah ba lada don kano kano ka jingsuba ba ki briew ki ioh ia kane ka jingpang dei ban leit rah mar mar sha ki jaka ai jingsumar ban ioh ban peit bniah.
