Shillong, Nailar 25: U deputy Chief Minister u Bah Rowell Lyngdoh bad u myntri ka koit ka khiah u Bah AL Hek mynta ka sngi kila phah ia ka shithi iehnoh kam ka jong ki kum ki cabinet minister na ka kynhun myntri kaba la lam khmat da u Dr Mukul Sangma kum u myntri rangbah jong ka sorkar jylla.
Da ka jinghiar shuki noh jong kine ki ar ngut ki myntri sorkar, ka lad kala plié ia u Dr Mukul Sangma ban bujli ia ki myntri hapoh ka kynhun jong u. Ka jingpynsmai ia ki ar ngut ki myntri ki ban mih bujli ia kine ki ar ngut kiba la hiar shuki mynta ka sngi kan long lashai ka sngi ha ka por 11.30 baje mynstep hapoh Raj Bhavan.
Haba kren ha u SP News Agency, U Deputy Chief Minister Bah Rowell Lyngdoh, u Bah AL Hek myntri ba rim jong ka tand ka koit ka khiah kila ong ba kila hiar shuki mynta ka sngi na ka kynhun myntri, ha kaba ki la phah ia ka shithi inoh kam ka jong ki sha u myntri rangbah ka jylla u Dr Mukul Sangma.
Ki thymmei khubor na ka seng Congress ki iathuh, ba ka jingpynsmai minister kan long la shai ka sngi tang ar ngut ha ka jaka jong kine ki myntri kiba la resign mynta ka sngi. La ong ba leh se ki ban shah pynsmai la shai ka sngi kin long u speaker ba rim ka jylla u Martin M Danggo bad u Chief whip jong ka sorkar hapoh jong ka iing dorbar thawain ka jylla u Bah Roni V Lyngdoh.
