Shillong, Naiwieng 12: U Symbut Myntri Rangbah ka jylla u bah Prestone Tynsong haba jubab ia ka jingkylli jong ka Dr. Mazel Amapreen Lyngdoh ha kaba ia dei bad ka jaka kaba don ha Barik, na ka liang jong u myntri u la ong ba ia mynta kane ka dang lang jong ha ka jingpyrkhat ha ka sorkar kam pat shim kano kano ka rai.
Ha kane ka jaka ia mynta ka don ka ophis jong u Executive Engineer PWD (Road) jong ka Shillong Central Division, ka ophis jong u Assistant Executive Engineer PWD Road, Sub Division, ophis jong u Assistant Executive Engineer NH Sub Division, ophis jong u Executive Engineer PWD (Building) Electrical Division, Assistant Executive Engineer PWD(Building) Electrical Sub Division, ophis jong ka Assistant executive PWD(Roads) Shillong Building Sub Division bad ki jaka sah jong ki nongtrei ka tnad PWD.
Haba jubab ia ka jingkylli bynrap jong ka Dr Lyngdoh na ka liang jong u bah Prestone u la ong ba ka dei ka jingshisha ba ka tnad pynroi sor kala khot ia ka jingiakop dro ha kaba ia dei bad katei ka jaka bad ki nongdro ki don san ngut bad ka sorkar kala jied kawei kaba i tynnah.
U Myntri u la ong ba ka sorkar shuwa ba kan shim ia kano kano ka rai kan pan jingmud ruh na ki paidbah bad ka sorkar kan sa leh ia kaba bha tam na ka bynta ka jingmyntoi ki paidbah namar mynta ka jingiakren ka dang iaid hapdeng ki tnad sorkar.
U Myntri ba dei peit ia ka tnad pynroi khappud u bah Lahkmen Rymbui haba jubab ia ka jingkylli jong u bah Meralborn Syiem u la ong ba ka sorkar kala dep ban mang pisa T. 1 klur na ka bynta ki shnong ha khappud bad ka jylla Assam bad mynta u snem mang tyngka ka sorkar kan sa pynlait pisa biang.
Haba jubab ia ka jingkylli bynrap jong u bah George na ka liang jong u myntri u la ong ba kane ka Inter State Border Area development skhim ka dei tang kawei na ki kam pynroi hynrei ki don kiwei ruh ki kam pynroi kiba la pyntrei ha ki shnong khappud bad ka jylla Assam.
