Shillong, Lber 20: Katkum ka jingbthah jong ka Election Commission jong ka Ri India ha dien bala pyntrei kam ia ka Model Code ha dien bala pynbna ia ka election MP sha ka Lok Sabha 2024, ha kine ki 72 kynta ka ophis jong u Chief Electoral Officer kala weng ia ki dur jong ki nongialam seng sain pyrthei na ki website jong ka sorkar Meghalaya.
Ha kine ki 72 kynta la pynmih ia ki jingmaham sha baroh ki District, la pyntrei kam ia ki kynhun “Flying Squads” sha baroh ki Assembly Konstitwensi, la pyntrei kam ia ki kynhun peit bniah ha kaba ia dei bad ka jinglut jingsep jong ki kyrtong kiba thmu ban ialeh ia ka elekshon.
La batai sha baroh ki tnad sorkar ha kaba ia dei bad ka jingtreikam jong ka Model Code, la weng ia ki jingwah ia ki dur ki dar jong ki nongialam seng sain pyrthei na ki jaka jong ka sorkar, jaka jong ki riew shimet hapoh kine ki 72 kynta.
Katkum ki jingkhien kiba la ioh na ki District ha kaba pyntrei kam ia ka Model Code ha ka jylla katkum ki kyndon kiba la buh da ka Election Commission jong ka Ri India, ia ki poster kiba la weng na ki jaka sorkar 109 tylli, na ki jaka paidbah 248 tylli.
Ki banner kiba la weng, na ki jaka sorkar 228 tylli, na ki jaka jong ki paidbah 440 tylli, ki Hoarding, na ki jaka sorkar la weng 43 tylli bad na ki jaka paidbah la weng 58 tylli, la pyndam ia ki jingthoh ha ki kynroh, na ki kynroh ka sorkar hadpoh 24 kynta la pyndom 323 tylli bad hapoh ka 48 kynta la pyndam 599 tylli, na ki jaka paidbah hapoh 72 kynta la pyndam haduh 253 tylli.
