Khanapara, Nailur 06: Ka seng FKJGP mynta ka sngi ka leit ban jurip ia ka iew die masi kaba don ha Khanapara
khappud b
ad ka jylla Assam, kane ka jingleit jurip ka long ban lap la ia ki mrad kiba la wan kit sha poh ka jylla Meghalaya na ka bynta ban pyndon kam ha kaba bam doh ki dei ban long kiba koit ba khiah.Ha kane ka jingleit kila ia kynduh ruh ia ki nongkit kam jong ka KJBWA ban twad jingtmut na ki ha kaba ia dei bad kane ka kam khaii masi .
U Bah Dundee Cliff Khongsit General Secretary jong ka seng, haba kren ha ki lad pathai khubor, ha kane ka iew die masi u la ong ba baroh ki mrad kiba pynpoi sha ka jylla Meghalaya, la ki long ki masi, ki sniang, ki Blang, ki Syiar dei ban da examin da ki doctor ba ki dei kiba koit ba khiah kiba lah ban bam ki briew.
Kane ka jingthmu jong ka seng ha kaba ki leit ban jurip mynta ka sngi ia kane ka iew die masi bad kane ka jingleit jong ki sha kane ka iew die masi kaba don ha Khanapara ka long ruh ban ioh sngew ia ka jingeh jong ki nongkhaii masi ha kane ka jaka.
Na ka liang jong ka seng kan sa rah ia kine ki jingeh kaba kila ioh sngew na ki briew kiba trei ia kane ka kam sha ka sorkar, ba ka dei ban buh ia ki doctor ban peit khamtam na ka liang jong ka tand ba dei peit ia ki mrad.
U Bah Generous Warlarpih Vice president jong ka Khasi Jaintia Butcher welfare Association (KJBWA) u la pynpaw ia ka jingsngewnguh ia ki dkhot jong ka seng FKJGP kiba la wan ban ia peitlem ia kane ka kam kaba ki trei.
La iathuh ha khmat jong ki dkhot ka seng FKJGP ba shuwa ki snem 1994, ki don ki doctor jong ka tand ri mrad jong ka sorkar kiba exsamin ia ki masi ban pynthikna ba ki long kiba bit ba biang ban kit sha poh ka jylla Meghalaya ban bam doh, hynrei haduh katei ka snem la shu jah ki doctor na kane ka jaka.
Ha ka juh ka por u Bah Warlarpih u la kyrpad ia ka FKJGP ba kin ia kren lem bad ka sorkar ba kan don noh da ka ain ban ithuh ia ka Transit Pass da ka sorkar ha kaba ia dei bad ka jingkhaii bad kit ia ki masi ban pynpoi sha ki jaka bapher bapher jong ka Khasi Jaintia.
Haba ia dei bad ka jingkiew dor jong ka doh Masi ka daw ka long ba la jylla palat ka jingkhaii beain ia ki masi sha Bangladesh. Na ka liang jong ka KJBWA ka kloi ban treilang bad ka seng FKJGP na ka bynta kane ka kam.
