Shillong, Jylliew 18: Ka Graduate and Post Graduates Association of Ri Bhoi (GAPGAR) ha ka sngi Saitjaiñ ka la jied ïa ki nongkitkam kiba thymmai jong snem treikam naduh 2017-2020 ha ka general meeting kaba la pynlong ha Shillong.
Ka kong Jean J. Kylla kum ka president bad u bah S. Lyngshkor kum u general secretary jong ka GAPGAR kaba yn treikam kum ka seng treimon sngewbha na ka bynta ka bha ka miat bad ka roi ka par jong ka dong Ri Bhoi baroh kawei.
Ha katei ka sngi la jied ruh ïa ki nongkitkam thymmai kiba yn tynrong lem ïa ka kam ha kaba la jied ïa u bah Matthew K. Makdoh kum vice president, working president – bah Daminot Kharshandi, assistant general secretary Dr. K. Makdoh, secretaries bah Kyrmenlang Uriah public relation committee, bah Kamailang Nongmalieh academic and excellence committee, bah Dalanee Nongmalieh finance and fund raising committee and bah Mawjam Makdoh socio-economic and development committee bad nongbat pisa Bah bah L. Lapang.
Ïa ki executive member la jied shuwa tang arngut Dr. C. Masharing bad bah Mayralborn Syiem. Ha katei ka jingïalang la shim rai ba yn dang pynrung shuh ïa ki dkhot bad yn dang ap shuwa katto katne por ynda la pyndep ïa ka jingpynrung dkhot ha ki block bad ki dong bapher bapher.
Ka GAPGAR ka la tyrwa ruh ïa u nongmihkhmat ba rangbah u Dr. DD Lapang kum u chief adviser bad ka kong Gracefulness Sten kum ka adviser jongka association. Ka GAPGAR kadei ka seng jong ki samla kiba la pyndep ïa ka graduation bad kito ki post graduate jong ka Ri Bhoi distrik bad la seng ïa ka ha u snem 2014.
Ka jingthmu kaba hakhmat jong kane ka seng ka long ban kyntiew ïa ka Ri-Bhoi distrik bad ruh ban long kum ka seng ban pyrkhat thymmai kumno ban wanrah ïa ia ka jingkylla hapoh ka thaiñ Ri Bhoi.
