Shillong, Jylliew 04: Na kaliang jong ka kynhun Awaken India Movement (AIM), Meghalaya State Unit ki pynpaw da jingsngewsih haba iohi ia kum kane ka jingjia kaba wanhap hapoh ka ïing ka sem jong ka Longkur Longjait Kharbuki halor ka jingshah pyniap noh ki arngut shipara ha ka Shnong Nongrah.
Kumba ki sngewthuh hapdeng ka jinglong parabynriew katno ka pait ka dohnud bad jaw ki ummat ktang khlem da lah ban niewdor shuh ia kata. Kum ki khun bynriew hapdeng ka jinglong Khyllung ki la wan sha kane ka sla pyrthei da jingtip briew tipblei.
Pynban ha kita kiba don pat ia ka mynsiem Ksuid khlem jingsalia wat hapdeng ka jinglong Kpa, la kloi ban shim pat ia ka jingim jongkitei ki shipara ha la kajong ka kti. Ngi sngewtmang haba iohi bad ngi sngewkthang ban shu peitkai iaki.
Kumta ka kynhun AIM Meghalaya kan pynlong ia ka Jingthang Mombati ban pynpaw da jingsngewlem halor katei ka jingjia ha ka 6 tarik u Jylliew, 2022 hapoh Khyndai Lad naduh kapor 5 baje janmiet.
Ka kynhun ka khot ka iawer lang ia baroh ki nongshong shnong hapoh ka Jylla kynthei bad shynrang kumjuh haduh ki hep barit ha ryngkatlang kiba haïing hasem jong katei ka Longïing kaba shem ia ka jingsngewsih.
Ka AIM ka kyrpad ban iapoi ryngkatlang ha katei ka Jaka kumba la pynbeit kum kadak jong ka jingsakhi ban pynpaw ia ka jingsngewlem bad sngewsih khlem da lah ban pdiang ia kaba kum katei ka jingjia hala kajong ka Ri bad ka Jaidbynriew baroh kawei.
Baroh kum ki Nongshong Shnong ngin iapoi ryntih khlem kano kano ka jingsngewpher ba katei ka Longïing kan tip shai ba phin ieng ban sakhi da ka lynti ba bha ia barohlang kiba wan sngewlem halor katei ka jingjia.
U Blei Trai Kynrad Nongbuh Nongthaw un bishar hok ia kane ka jingjia baroh bad ba un ym iehnoh hapdeng ka lynti ba bakla hynrei da jingsakhi ba khuid halor ka Hok bad Jingshisha un ialam ia kata.
Ka Longïing Longsem jongkitei ki Khyllung baroh kawei kan ioh ia ka jingduwai phirat kaba kyrpang bad ruh da jingpyrkhat sngewlem napdeng jongngi baroh ki parabynriew ban iadonlang. Watla jingduh bad jingsngewsih namar jongphi ka long, hynrei Leitsuk bad shongsuk ha Duwar U Blei.
