Shillong, Iaiong 20: Baroh ki nongkhaii ha kane ka Ri India, naduh ki kompeni kiba heh, haduh ki nongkhaii kiba rit kila tip ba ka sorkar pdeng kan pyntrei kam noh ia ka rukom lum khajana kaba thymmai ia kaba la tip kum ka ‘Goods and services Tax’ lane ia kaba la khot lyngkot ka GST.
Ka sorkar pdeng kala pynbna ba kan pyntrei kam ia kane ka GST naduh ka shitarik jong u Naitung mynta u snem ha baroh kawei jong ka Ri India bad kane kan long ka jingkylla kaba khraw ha kaba ia dei bad ka rukom lum ia ka khajana kaba thymmai bad ka kam kaba ha khmat jong ka sorkar ka long ban pynsngewthuh ia ki paidbah ha kaba ia dei bad kane.
Ka jingpynshai bad pynsngewthuh paidbah ha kaba ia dei bad kane ka GST yn sa pynlong ha baroh jong kawei ka Ri India ha kaba hap ban batai bad ban pynshai ia ki nongkhaii lyngba ki jingialang bad kum juh lyngba ki lat pathai khubor. Kum shi bynta jong kane ka jingpynshai paidbah yn sdang na nongbah jong ka Ri India ha ka 25 tarik mynta u bnai ha Media Centre ha nongbah Delhi.
Na ka liang jong ka ministry fiancé jong ka sorkar pdeng kala ai ia kane ka email ID ba lada don kiba kwah ban ioh jingshai ki la lah ban phah ia ki jingpynjingpynshai ha ka dprfinance@gmail.com bad ia ki jingkylli la lah ban pynpoi shuwa ka 22 tarik mynta u bnai shuwa katei ka jingpynshai paidbah ha kaba ia dei bad ka GST ryngkat ki jingai jingmut lada don.
