Shillong, Nailar 12: ka Jowai Municipal Board kala shem jingeh ban bret ia u niut ba mih na katei ka sor ka daw ka long ba kam don ia ka jaka bret niut kaba pura haduh mynta, ka jaka bret kaba juh bret baroh shikatta ha Mynkjia kan long tang shipor.
Katkum ki lat khubor kiba u SP News Agency u la ioh la ong ba ka jingeh kaba mih mynta ka long namar ba kim ioh jaka ban bret niut namar bun na ki jaka kiba la dep ban peit ban shim la mih bun ki jingujor na ki shnong ki thaw kane ka la buh ia ka JMB ha ka jingeh kaba khraw.
Ka jingleit ki briew mynta ka sngi sha ophis jong u Deputy Commissioner bad ban ia pyrta ba ki kwah ia ka jingkhuid jingsuba hapoh ka sor Jowai da kaba leit ban bret ia ki jakhlia kiba la song ha ki plastik ha khmat katei ka ophis kala dang buh shuh shuh ha ka jingeh namar ba ka JMB kam don ia ka jaka bret niut kaba pura.
Lah ban kdew ba u bah W. Shylla MLA jong ka Jowai u la iathuh ha u SP News Agency ha kine ki khyndiat sngi ba kila don lai tylli ki jaka ba la tyrwa sha ka sorkar bad mynta ka shong ha ka sorkar ban shim ia ka rai ban jied ia ka jaka na pdeng ki lai tylli ki jaka ba la tyrwa ban pynioh ia ka jaka bret niut kaba paka.
