Shillong, Lber 24: U Myntri Sorkar Pdeng ba dei khmih ia ki tnat Tourism, Culture, DoNER bad Vice Chairman ka North Eastern Council (NEC) u G. Kishan Reddy mynta ka sngi u la pynlong ia ka jingialang bad ki ophisar ka NEC ha secretariat complex, Shillong ban peit ia ki kam ba trei.
U G. Kishan Reddy u la ai jingmut ba ka NEC ka dei ban pynkhreh kham biang ia ka jingialang ban wan bei tyngka na kylleng ka pyrthei ka ban dang long ha u bnai Iaiong- Jymmang, 2023.
U la ong ba lah ban pynlong lang ia ka prokram da ka NEC ha ryngkat kane ka Summit da ka tnat DoNER ha kaba ka NEC ka lah ban peit bniah ia katto katne ki kam kiba kongsan jong ka thain kum ka kam jngohkai bad ka kam ai jingtip sha ki paidbah.
U la ong ba ka NEC ka lah ban phaikhmat sha ki nongbei tyngka kiba don ha ki kam jngohkai bad ki jaka Pdeng jong ka Information Technology kum ka Bangalore, Hyderabad, Pune, ha kaba ka lah ban khot sngewbha ia ki ba kin wan iashim bynta ha ka Summit khnang ban khring shuh ia ki jingbei tyngka ha ka thain shateilammihngi.
U Vice Chairman ka NEC, u la ong ba ka NEC ka dei ban kyntiew ia ki jaka sah briew kiba tip kum ki home stay ha ka thain shateilammihngi. U la ong ba ka NEC ka lah ban pynkhreh ia ka jingtyrwa ban wanrah ia ki lad ioh ram ban kyntiew ia kine ki jaka sah ha kaba ka Sorkar ka lah ban bah ia ka sut jong ki jingshimram da ki traijong ki jaka sah briew.
U Vice Chairman u la ai jingmut ba ka Northeast Cultural Centre kaba thmu ban shna ha Dwaraka, New Delhi ka dei ban don ki lad ban pynlong ia ki jingpyni mar, ki jingiamir jingmut bad ki prokram ba iadei bad ka deiriti. U la ong ruh ba ka NEC ka dei ban pusonkumno ban pyniar ia la ki kam ha ka thain namar baroh ki jylla ki lah ban ioh jingmyntoi na ka NEC.
Ha shuwa kane baroh, u Secretary K. Moses Chalai u la pdiang burom ia u Myntri Sorkar Pdeng bad u la batai ia u shaphang ka jinglong jingman ha ka Council Secretariat. U la ong ba na ka bynta ka Northeast Council Culture Centre kaba la sanction ha Sector 13, Dwarka, la ai ia ka kontrak.
U Secretary u la ong ba kawei na ki kam kiba kham kongsan kaba kham bun ki lad ha ka thain shateilammihngi ka dei ha ki kam IT, khamtam ha kaba iadei bad ka Industry 4.0, ha ryngkat ki kam kum ka 3D printing, Artificial intelligence bad kiwei kiwei.
U Planning Advisor, u Bah C.H. Kharshiing u la batai shaphang ka jingdon ki nongtrei ha ka NEC bad u la ong ba namar ki post ha ka Secretariat ki dei kiba la sanction haduh 40 snem katkum ka jingdonkam ha kanokano ka por, ki don shibun ki post kiba la sanction marwei ha kaba ym don lad ban kiewshaphrang.
U Advisor Transport, u Navin Kumar u la batai shaphang ka kam kaba iadei bad ka North East Road Sector Development Scheme (NERSDS), kaba la sdang ha u snem 2014-15 bad u la ong ba hapoh kane ka skhim, ka NEC ka la ai jingmynjur ia 29 tylli ki projek surok kiba dang don ha ki bynta bapher bapher jong ka jingshna katba ki don ruh kiba la pyndep.
U la ong ruh ba naduh u snem mang tyngka 2022-23, ka skhim kaba thymmai kaba tip kum ka North East Special Infrastructure Development Scheme (Roads) ka dei kaba la ioh jingmynjur na ka kynhun Myntri ka Sorkar Pdeng bad ba ia ka NERSDS kaba mynshuwa la pyniasoh lang bad kane ka skhim.
Baroh ki ophisar kiba la long heh kiba kynthup ruh ia u Financial Adviser u GaigongdinPanmei, Economic Adviser ka S. Lalthangzo Sherry bad Economic Adviser (HR) u Satyen Lama ki la iadon lang ha kane ka sngi.
