Shillong, Jymmang 30: Ka Khasi Students’Union Jaintia Hills Dist (KSUJHD) ka pynrem jur ia ki pulit ka Ri Bhoi District namar ka jingshoh bad bom dusmon ia ki dkhot ka seng. Kane ka jingshoh bad jingbom ki pulit ia ki dkhot ka seng ka pynpaw ia ka jinglong riewkhlaw ki bor ka ain.
Ka jingshah bom shah tied bad ka jingpynngat ha ki kyndon ain bapher bapher ia ki dkhot ka seng ka long pynban kumba ai ding ha u langiap. Namar ka jingbymlah shah shuh ia ka jingleh donbor ka company infrastructure ban pyntrei jubor ia ka lynti rel ha Byrnihat khlem da ioh ka NOC na ka KHADC bad ka jingbympat lah ka sorkar u Mukul ban wanrah ki ain ban teh lakam ia ka jingrung kyrthep ki mynder ka pynlong ia ki dkhot ka seng ban hiar thma kynsan ia ka ktem katei ka company.
Nalor ba ka KSU bad ki paidbah ki pynpaw ia ka jingpyrshah ia ka lynti rel, hynrei katei ka company ka iaid beit shaphrang ia ka jingtrei. “Ka jingshah hiar thma ha kato ka sngi ka long tang ka jingsdang. Lada phi kwah iaka shongsuk shongshngaiñ hapoh ka jylla te sngewbha pyllait mardor noh ia ki nongialam khlem pynngat ha kano kano ka kyndon bad pynsangeh noh iaka jingpyntrei lynti rel, Ne mad Jingiakhih ngi lah long kiba lah khreh ban iakhih lada ha kano kano ka bynta ruh”.
“Ngi long ka jaitbynriew ba tang shitroh ka jingbun paid bad lada ailad ia ka lynti rel ban poi ngin sa shah tyllep lin bad ngin sa shah beh nangne, ngin shah knieh ka khyndew ka shyiap, ka ioh kam ioh jam bad ka khaii pateng, kumta horkit hordang ngin ym ai lad ia ka lynti rel”. Kumba ka KSU naduh ki nongialam barim ki ieng pyrshah ia ka jingpynpoi lynti rel sha ka jylla jongngi.
Ka KSU JHD ha kajuh ka nongrim ka ieng bad ki nongrim ka seng kin ym kylla. Ngi iohi ka jingma bakhraw kaba ap ia ka jaidbynriew lada ngi ai lad ia ka lynti rel. Lada ka sorkar ka kwah ia ka shongsuk shongsain ka dei ban pynsangeh mardor ia katei ka company ban bteng ia ka jingtrei, namar ka seng kam nang ban pynsangeh da ka ktien hynrei da ki kam. Kyrwoh na Ohibait Dkhar President (KSUJHD)
