Shillong, Rymphang 08: U Nongialam jong ka Meghalaya Joint Action Committee on Commercial Vehicles (MJACCV) u bah Wandonbok Jyrwa ha ka jingkren jong u ha ka jingialang paidbah kaba la long mynta ka sngi ha Motphran, la pynbna ba ka jingsangeh kamai ki kali kamai kan dang iai bteng, katba ka sorkar kam pat pynhiar 25% ka khajna ia ka Umphniang bad 50% ka khajna ia ki kali.
Ban pynshai halor kane ka jingdawa na ka liang jong kiba niah bad buh kali kamai ka long ba ka sorkar pdeng ka shim ia ka khajna ia ka umphniang hapoh ka 19 tyngka shi litter bad lada ka sorkar jylla ka pynghiar da 25% ka long ba kan ia wandur bad ka jingshim khajna jong ka sorkar pdeng.
Haba ia dei bad ka khajna ia ki kali kamai, u bah Jyrwa u la ong ba naduh bas dang ka COVID-19 la shuh shah khangdam khlem ioh kamai, ha dien ba la pynlait ruh ki ioh ban kami tang 12 sngi ha ka shi bnai katba ka sorkar pat ka phah siew 100% ka khajna, kane ka long kaba kim lah ban pdiang.
La pynbna ba ka MJACCV la shai ka sngi kin bteng ia kane ka jingiakhih jong ki da kaba pynlong ia ka jingshah thngan la shai ka sngi ha khmat jong u mot jong u Kiang Nangbah ha jan Civil Hospital Shillong bad ia ki jingiakhih ki ban dang bud kin sa pynbna la shai.
Na ka liang jong ki nongialam ka MJACCV, kim salai ban ia leh ban dawa na ka sorkar ia ka hok kaba dei ban ioh, lada ka sorkar kam pynngat ia ki ha ki kyndon ain bapher bapher ruh kim salai hynrei kin bteng ia ka jingiakhih haduh ba ka sorkar kan pynurlong ia ki jingdawa.
Haba ia dei bad ki kali saw u bah Jyrwa u la ong ba um don ei ei ban ong namar ki dei ki kali sorkar, la iathuh ba ha ka jylla baroh kawei ki kali kamai ki don palat ia ka 25,000 tylli.
Kiwei kiba la kren ha kane ka jingialang ki long u bah Alpha Nongkhlaw, bah Peter Dohkrud, bah Marbud Dkhar, baroh kine ki nongkren ki dawa na ka sorkar ba ka dei ban sngap ia ka jingdawa jong ki paidbah namar kane ka ktah ia ki paidbah.
