Shillong, Sept 03: “Ngi la dawa ban don ka jingtohkit kaba laitluid ka jingtohkit da ka iing bishar halor ka jingshah siat iap u bah Cheristerfield Thangkhiew ha kti ki pulit, nga ngeit ba ki paidbah ruh ki dawa ia kane ka juh kaba dei ka jingtohkit kaba laitluid, ha kane ka jingiajia phi dei ban sngewthuh ba ka don ka jingjia kaba la kren ia kata ka jingiasiat khlem daw kaba ki khot “Fake Encounter” la ong u Dr Mukul.
Haba kren ha ki lat pathai khubor u Dr Mukul u la ong ba ka jingshah kynnoh ha kane ka jingiasiat khlem daw dei na ki pulit, lada ong ba don kam ia ka jingtohkit kaba laitluid, kumno phin pynthikna ba kan dei kaba laitluid, mynta lada ka jingkynnoh ka long sawdong ia ki pulit kiba ha khlieh, hato ki don kata ka jingshaniah ban ong ba kata ka jingtohkit kan long kaba laitluid.
Lada ia kito ki ophisar kiba ha khlieh kaba ka jingtoh kit kan long pyrshah ia ki lada ki dang don ha ophis, dei hangne ba ka sorkar ka hap ban peit ba ka jigntohkit ka dei ban long kaba laitluid, nga kren ia kane katkum ki kyndon ka ain, la ong u Dr Mukul.
Kumba ki don ka jingantad, ki bor ba dei ki hap ban leh ban pynthikna ba kata ka jingtohkit kan long shisha kaba laitluid dei ban pynlait na ki bor kiba don hapoh jong kata namar kin don shibun ki pulit kiba don hapoh jong ki ia kaba hap ban tohkit ia ki, hato kin long shisha kiba laitluid ban kren ia kine baroh hap ban sngewthuh.
U Dr Mukul la ong ba ia kaei ba dei ban leh kan shong ha ka kaiphot jong ka kynhoh tohkit, hynrei shuwa ban ioh ia ka kaiphot ban pynthikna ba ka jingtohkit baroh kan long kaba laitluid lane kata ka jingtohkit kan nym shah pynthud la sngewthuh ba kan don ka jingtohkit pyrshah ia ki pulit ha ki kyrdan bapher bapher, hato ki pulit kiba kham rit kyrdan kin nud ban kren ia ka jingshisha kylli u Dr Mukul.
