Shillong, Nailar 11: Ka Meghalaya Editors’ and Publishers’ Association (MEPA) kaba dei ka kynhun jong baroh ki lad pathai khubor ha Meghalaya ha ka jingiakynduh kaba kyrkieh kaba la long mynta ka sngi ka 11 tarik Nailar, 2021 ka pynpaw ïa ka jingsngew kyndit ka bakhraw halor ka jingpynmih khubor jong ka seng Hynniewtrep National Liberation Council (HNLC) kaba la byrngem ia ki lad pathai khubor halor ka jingbymlah jong ki ban pynmih khubor ïa ki jingkhot pakhang shnong jong ka HNLC na ka por sha ka por.
Shuh shuh kaba kham sngewkhia ka long ba ka HNLC ka la rai ban kheiñ ïa ki lad pathai khubor kum ki nongshun jongka tang na kane ka daw. Ka MEPA kam ju mutdur ba kaba kum kane ka kyrwoh kan mih na ka HNLC.
Halor jong kane ka kam, ka MEPA ha kane ka jingiakynduh mynta ka sngi ka la rai ban kyntu ïa ka HNLC ba kan sngewthuh lem ba ki lad pathai khubor kim lah shuh ban pynmih ïa kino kino ki jingkhot pakhang shnong jong kino kino ki kynhun katkum ka hukum jong ka Meghalaya High Court No. WP (C) No. 127/2015 Dated 27.05.2015.
Katkum kane ka hukum, ka High Court ka la kren shai ba kan pynngat ha ki kyndon jingpynkhein hukum (Contempt of Court) ïa kino kino ki lad pathai khubor kiba pynmih khubor ïa ki jingkhot pakhang shnong bad ruh ka la hukum ia ka sorkar ban pynngat ha ki kyndon aiñ kiba tyngeh (criminal case) ïa ki lad pathai khubor kiba pynkheiñ ïa katei hukum jong ka High Court.
Na ka liang ka MEPA ka la leit shaduh sha Supreme Court ban iakhun mukotduma khnang ban pyndam ïa katei ka hukum jong ka High Court. Hynrei ka Supreme Court hadien ka jingshong bishar ia kane ka mukotduma ka la pynksan ïa ka rai jong ka High Court.
Ki lad pathai khubor jong ka Meghalaya haduh mynta ki ïeng halor ka nongrim jong ka jinglong pdeng bad jingbym shah liang shano shano bad ruh halor ka nongrim jong ka jingpathai khubor kaba laitluid bad ka bym shah khñiot hano hano. Ka MEPA ka pynpaw ruh hangne ba ki lad pathai khubor ki ïeng ban shakri ïa ki paidbah salonsar bad ki long ka sur jong u paidbah ha ka ri synshar paidbah.
Halor kane, na ka liang ka MEPA ka kyntu ïa ka HNLC ba kan sngewthuh ïa ki jingshisha baroh kumba la pynpaw haneng khamtam ba ki lad pathai khubor ki hap ban bud ryntih ïa ki kyndon ka aiñ katkum katei ka hukum jong ka ïing kashari, kane ka long kyrwoh kaba la phah da u President u bah RM Shabong bad u General Secretary u bah John W. Thabah, jong ka MEPA.
