Shillong, Jymmang 25: U Symbut Myntri Rangbah ka jylla u Bah Prestone Tynsong u la iathuh ba ka sorkar mynta ka sngi kala ia kren biang ha kaba ia dei bad ka jingkyrpad jong ki ba bun ba lang ban plie noh ia ka Iewduh bad ia ka iew ha Police Bazar.
Ha kane ka jingkynduh mynta ka sngi hapoh ka jingpyniaid jong u Myntri Rangbah ka jylla kila ia kren sani bha bad ha kane ka jingiakren kim pat lah ban shim ia ka rai ban plie ia ka Iewduh bad ia ka Iew Police Bazar, namar ba dang hap ban ban jingmut shuh shuh na u Syiem ka Hima Mylliem, SP jong ka East Khasi Hills bad ka KHADC.
Hynrei namar ba kane kala dei ka por ba mih ki jhur, ka sorkar kala shim ia ka rai ban pynkylla Iewdilang ia ka jaka ieng kali kaba don ha Mawlong Hat ia ki jhur, ka mala kaba nyngkong bad ka mala kaba ar jong kane ka jaka ieng kali yn shah ban pynlong ia ka iew dielang ha kane ka jaka.
U bah Prestone u la ong ba ka sorkar ka sngewthuh ia ka jingduh jong kito kiba buh dukan namar kane ka jingpakhang bad ka sorkar ka wat kilat ki lynti kumno ban ialeh ban plie katto katne ki bynta jong kitei ki ar tylli ki iew. La iathuh ba la don shibun kiba kyrpad ban shah ban plie ia kine ki ar tylli ki iew.
Halor ka jingpynsngew jong kiwei briew ba kan don ka jingma lada plie ia kine ki ar tylli ki iew, na ka liang jong u symbut myntri rangbah u la ong ban ialeh pyrshah ia kane don kam ia ka jingiatreilang da baroh ki briew, ka sorkar kan nym lah ban buh pulit, hynrei ka dei ka kamram jong u wei pat u wei ne kawei pat kawei kiba la rangbah ban but ia ki jingbthah jong ka sorkar lada kim but kan buh ha ka jingeh.
