Shillong, Nailar 22: U Bah Embhah Syiemlieh MLA jong ka Mawlai constituency mynta ka sngi u la pynlait paidbah ia ka kot kaba la thoh da u Bah K.Neldarson Sohkhlet , ia kaba la ai kyrteng ka “ Ka bisharklim ha ka shnong Warmawsaw”.
Ha ka jingkren jong u Bah Syiemlieh u la ong ba, baroh ki briew ki kiar ban ia kren halor kane ka phang, hynrei une u rangbah u la mih ban madan ban thoh da ka kot halor kane ka bynta kaba ki briew kim da ia kren than, bad kane ka kot kaba la pynlait mynta ka sngi kan long ka jingkyrsiew thiah ia ka jaid bynriew.
La ong “ Ngam da sngewthuh than ia kane ka bynta ba nga dang shong samla, hynrei kaei kaba nga sngewthuh ka long, lada ka shongkha shong man ka khlain, ka jaid bynriew ka khlain, lada ka shongkha shongman ka tlot, ka jaidbynriew ka tlop”.
Ka jaid byrneiw kumba ka long mynta ka don hapdeng ka jingma kaba khraw, lada kane ka juk ka iaid kumba ka long mynta ha ki 20 bad 30 snem ban wan kane ka jaid bynriew kan sa shah lyngdhop ha ki jingeh bad kaba “ Nga I ma palat na kane ka jingiashong kha khleh”. Hynrei ka pdeng kane ka jingdum ka wan kane ka jingshai ha kaba u rangbah, bah Nel u ba juh ia khoit ieit u la pynmih ia kane ka kot.
Ha ka jingkren jong u bah PT Sawkmie MDC u ba long ruh u CEM jong ka KHADC u la ong ba, ka long ei ei kaba sngew hun ban iohi ba ki riew rangbah ki mih ban noh sha ka jaidbynriew da ki jingthoh kiba long kor dor, kum kane ka kot kaba la pynlait mynta ka sngi.
U la ong ba kaba kongsan ka long ban pyndon kam ia la ka jong ka sap ka phong hala ki jong ki jong ki bynta ban shakri ia ka jaidbynriew bad u bah Nel u la leh ia kata da kaba pynmih ia kane ka kot mynta ka sngi bad kane ka long ka jingkyrkhu ia ka jaidbynriew.
Kiwei kiba la kren ki long u Bah C . Khongwir , bah M.W Nongbri, u Bah M Doloi sordar jong ka shnong Warmawsaw, u Bah Nel ha ka jingkren ai khublei u la ong ba ia kane ka kot u la ai nam sha u khlur ialehkai kynjat bol u Bah Eugeneson Lyngdoh. Ia kane ka sngi la sakhi ruh da kiba bun ki nongthoh kot bad kiba ha iing ha sem.
