Shillong, Naitung 07: Ka Khsi Student Union (KSU) ka dawa na ka sorkar bad ka KHADC ba ka dei ban pynshitom ia ka Uranium Corporation India Limited (UCIL) namar kala khot ia ka tender kumba la paw pyrthei khlem da ioh jingbit na ka sorkar bad na ka KHADC, la ong u Bah Daniel Khyriem president ka seng.
Haba kren ha ki nongthoh khubor mynta ka sngi ha ophis trei kam jong ka seng u Bah Khyriem u la ong ba mynta kala paw pyrthei ia ki kam buhrieh jong ka UCIL, ha kaba kala pynbiej ia ki paidbah da ki kam pynroi ban ioh khlong ia u Marpoh khyndew na ka tei ka jaka.
Halor kane ka seng kan sa phah sha u myntri rangbah jong ka jylla u Dr Mukul Sangma ban pan jingpynshai halor kane ka jingkhot tender jong ka UCIL ban tih Uranium na katei ka thain West KHasi Hills bad kum juh na ka liang jong ka KHADC.
Kane ka jingkhot tender jong ka UCIL, kala kren shai kdar ba ka kwah ban tih ia u Uranium na katei ka jaka da ka bor haduh ba ka khlem burom ruh ia ka sorkar jylla bad ia ka KHADC, namar ka seng ka la ioh jingtip ba ka sorkar bad ka KHADC kam pat ai ia ka NOC, la ong u bah Daniel.
Ka seng kam pyrshah ia ki kam pynroi, hynrei ka pyrshah ia ka jingtih ia u Uranium ka ban ktah ia ka koit ka khiah jong ki paidbah ka tei ka thain bad ka jylla baroh kawei. Na ka liang jong ka seng ka dang plie ia ka jingkhang ban ia mir jingmut halor kane ka bynta lada ki don ki stad kiban ai jingshai.
Kine ki kam pynroi kaba ka UCIL ka leh ha katei ka thain ka long ban pynbiang ia ki nongtrei jong kane ka Company ban ioh tih ia u Uranium, kan don aiu sha lyndet ban ong ban shna ia ki surok kiba heh ha ki jaka ba khlem pat don kam surok, ka sorkar ka dei ban pynbha ia ki surok kiba la don lypa.
Ka seng kSU ka dawa na ka sorkar bad ka KHADC ba kam dei ban ai NOC ban tih Uranium , lada dei ban ai NOC ka dei ban ai tang ban pynbha ia ki surok ba la don lypa mynta. Ia kane ka jingpyrshah tih Uranium ka seng kala juh kren na ka por sha ka por ba kan dang iai beteng ia kane ka jingpyrshah.
U General Secretary jong ka seng KSU u Bah Augustar Jyrwa, u kyntu ia ki para sengbhalang baroh bad ia ki rangbah shnong katei ka thain kiba kwah surok ba kin da pyrkhat bha halor kane ka bynta namar mynta la iohi shai kdar ia ka buit jong ka UCIL ba ki jingpynbeit baroh da ki kam pynroi ka long ban tih Uranium, ka jingkynnoh pyrshah ia ka KSU mynta kala paw aiu ka UCIL ka kwah ban leh ha katei ka thain.
