Shillong, Iaiong 04: Ka sorkar Meghalaya ka la plie paidbah ia ka Mission Mode Project na bynta ka Aadhaar Seeding jong ki nongioh jingmyntoi na ka National Food Security Act (NFSA) khnang ban kyntiew ia ka jingiaid beit iaidryntih ha ka rukom sam marbam.
Ïa kane ka jingïalang pyllait paidbah, kaba la long hynne ka sngi palei ha Shillong, la pynïaid da u Myntri ba dei peit ïa ka tnat Food, Civil Supplies & Consumer Affairs, u Comingone Ymbon, ha ka jingïadonlang u Commissioner & Secretary u P. Bakshi, ki nongïalam shnong, ki nongdie Fair Price Shop bad kiwei de ki nongshim bynta.
Haba kren ha kane ka jingialang paidbah, u Comingone Ymbon u la ban jur ïa ka jingdonkam kyrkieh jong ka mission, da kaba kdew ba tang 48.77% na ki nongïoh jingmyntoi na ka NFSA, kata kumba 10 lak ngut ki la pynïasoh Aadhaar, katba dang sah haduh 11 lak ngut ki nongïoh jingmyntoi ki khlem pat pyniasoh ki adhaar jongki bad ki shah ktah hapoh ki 84 sngi ban wan, lada kim lah ban pyniasoh bad ka NFSA.
U la pynpaw ruh ba ka jingpyniasoh bad u Aadhaar kan pynduh noh ïa ka jingpynmih arsien ki kyrteng, kan pynthikna ïa ka jingsam hok ïa ki marbam, bad khamtam kan ïada na ka jingpyndonkam bakla.
“Ka sorkar India ka la ai por ba khatduh ia ngi ha ka 30 tarik u bnai April 2025, ban pyndep 100% ka jingpyniasoh Aadhaar. Lada ngim lah, ka sorkar pdeng ka lah ban ot ia ka bhah khaw. Kane kam dei ka skhim jong ka jylla, hynrei ka dei ka skhim sorkar pdeng kaba thmu ban pynthikna ia ka jingkitkhlieh bad ka jingkhuid jingsuba” la ong u Comingone Ymbon.
U la pynpaw ba ka rukom pyniasoh Aadhaar ka long kaba kongsan ban pynthikna ba ki marbam kin poi sha kiba dei hok ban ioh, kynthup ïa ki nongrep, ki nongbylla sngi, ki longkmie ha nongkyndong bad ha sor jong ka jylla Meghalaya. Nalor kata, u la pynskhem ba kane ka jingthmu kan lah ruh ban weng noh ïa ki nongïoh jingmyntoi ki bym dei hok ban ioh ki marbam.
U Comingone Ymbon u la ong ba la buh ka rukom pyntreikam kaba bniah, da kaba aiti ia ki bynta ba kongsan sha ki nongshim bynta bapher bapher. Ki Deputy Commissioner, ki Ophisar Sub-Divisional, bad ki block Ophisar, ki la shah bynshet ban ialam ia ka jingpyntreikam ha la ki thaiñ. katba ki nongialam shnong ruh kin long kiba kongsan ha kaba pynsngewthuh bad pynphriang ia ka jingtip ha ki nongshongshnong.
Ha kajuh ka por u la ong, ki 4500 tylli ki Fair Price Shop dealer lane ki dukan sam khaw rashon ha kylleng ka jylla kin long kum ki jaka pynrung kyrteng na ka bynta ban pyniasoh Aadhaar.
