Shillong, Jylliew 27: U myntri rangbah ka jylla u Dr Mukul Sangma u la dep ban pynbna hapoh ka iing dorbar thaw ain jong ka jylla ba ha u ne u snem mang tyngka 2016-17 ka sorkar kan thaw thymmai ar tylli ki Block ha Khasi Hill bad ar tylli ha Garo Hills hynrei naduh mynta kam pat don kano kano ka jingthoh kaba ka sokar kan phah sha ki Block kiba dei ban phiah.
Katkum ki thymmei khubor kiba la ioh da u SP News Agency, la sngewthuh ba ka sorkar jylla lyngba jong ka tand pynroi nongkyndong haduh kine ki sngi kam pat phah kano kano ka jingthoh sha ki Block kum ka Mylliem Block kaba dei ban thaw thymmai da ka Mawlai Block bad ka Umroi Block da kaba phiah na ka Umsning block.
Kane ka juh ka long ruh ia ki ar tylli ki block ki ban sa thaw thymmai ha garo Hills, na ka liang jong ka tand pynroi nongkyndong kam pat don kano kano ka jingthoh ban pyntip sha ki Block development ophisar halor kane ka jingthmu jong ka sorkar wat la ka sorkar kala dep ban pynbna ia ka policy trei kam ka jong ka.
Ki thymmei khubor ki iathuh ba kumba ka long mynta ka jingiaknieh ban ioh buh ia ki ophis jong ki block kala sdang paw pyrthei ha kaba ka seng FKJGP Mawlai Circle kala dep leit ban ia kynduh ia u myntri ka tand pynroi nongkyndong u Bah Prestone Tynsong ban dawa ba ka Mawlai Block ka ophis ka dei ban don ha Mawlai.
