Shillong, Rymphang 13: Ka Mawlai Town Dorbar Committee (MTDC) ha ryngkat u MLA jong kane ka jaka u Bah Embhah Syiemlieh kila leit ban ia kynduh ia u Bah Sngewbhlang Dhar myntri ba dei peit ia ka tnad Community bad Rural Development (C&RD) ban ia kren halor ka Mawlai C&RD Block kumba la pynbna da u myntri rangbah ka jylla u Dr Mukul Sangma hapoh ka iing dorbar ha ka dorbar mang tyngka jongu snem 2016-2017.
Ha dien ka jingiakynduh ia u myntri ka tnad pynroi nongkyndong u bah Embhah Syiemlieh, haba kren ha ki lad pathai khubor u la ong ba ha kane ka jingiakren na ka liang jong u myntri u la ong ha ki ba ka sorkar haduh mynta kam pat shim ia ka rai ha ei ban buh ia ka ophis jong ka Mawlai C&RD Block.
Ha kane ka jingiakynduh na ka liang jong ka Mawlai Town Dorbar Committee kala ong ia u myntri ka tand pynroi nongkyndong, ha kaba ia dei bad ka jaka ki ong ba kam don kano kano ka jingeh ki kloi ban ai sngewbha khlem da don kam ban siew ei ei ruh em ban buh ia kane ka ophis jong ka Block.
U bah Embhah MLA jong kane ka jaka u la ong ba na ka liang jong ka Mawlai Town Dorbar Committee kan dang leit ban ia kynduh ia u myntri rangbah jong ka jylla u Dr Mukul Sangma ban ia kren halor kane ka kam. Ha kane ka sngi na ka liang jong u MLA u la air uh da ka jingthoh sha u myntri ka tnad pynroi nongkyndong.
La iathuh ruh ba na ka liang jong ka Mawlai Town Dorbar Committee kan don ka jingiakynduh lang ka jong ki ha ka 15 tarik mynta u bnai ban ia kren ia kane ka kam. La ban biang ba ia ka jaka kam don jingeh ei ei ruh em ba ka sorkar kan buh ia ka ophis jong ka Block bad ka dorbar hi kan ai ei khlem da don kam jingsiew ei ei ruh em.
