Shillong, Nailar 19: Ka Sorkar ka la rai ban ai ka jingïarap ha ka dur ka pisa khnang ba ki nongrep ka Jylla kin ioh jingmab noh da 2% na kaba ki la shim ia ka ram na ka Kisan Credit Card (KCC).
Ia kane la pyntip da u Myntri ka tnad Agriculture ka Sorkar Jylla, u Bah Banteidor Lyngdoh, haba kren ha ki lad pathai khubor hadien ka jingialang ba u la lum kynthup ia ki nongialam ki Seng Nongrep (Farmers’ Association), ki Synjuk Nongkhaii mar rep, ki ophisar ka tnad Agriculture bad Horticulture, ha ka sngi Balang.
“Ka Sorkar Jylla kan iarap ha ka dur ka pisa khnang ba ki nongrep kin ïoh jingmab da 2% na ka ram ba ki la shim hapoh ka KCC”, la ong u Bah Banteidor hadien ka jingialang kaba la ia mir jingmut sani bha halor ki jingeh kiba ki nongrep bad nongkhaii mar rep ki ia kynduh na ka daw ka jingwan lynshop ka khlam COVID-19 bad kumno ban weng ia ki.
U la pynpaw ruh ba ka la don ka jinghiar na ka liang ki nongrep kiba shim ram KCC mynta u snem. Haba kylli, u la ong ba kam don kano kano ka jingtyrwa na ka Sorkar ban mab ia ki ram ba ki nongrep ki la shim.
“Kam don kaba kum kata ka jingtyrwa namar ka ram ba ki la shim ka la long shwa ka khlam COVID-19 hynrei pat ngi la pynlong ki jingialang bad ki Bank bapher bapher ban pynjlan ia ka por ba ki nongrep kin pyndep siew ia ka ram ba ki la shim”, u la ong.
Ha kawei pat ka liang, u Myntri u la iathuh ba ka jingialang ka la rai ban nym rakhe mynta u snem kum u ‘Snem Ki Nongrep’ na ka daw ka khlam COVID-19. U la ong pat ba ka Sorkar kan sa pynbna shen ia ki lad jingïarap ba kynthup ban sam ia ki Power Tiller sha ki nongrep ka Jylla.
“Ngi la rai ban ia treilang ban kyntiew ia ka bha ka miat ki nongrep”, u la ong.
Halor ki jingkynnoh ba ki don ki jingshah ban beiñ ia ki kali kit bad khaïi mar rep, u la ong ba un shim khia ia kane bad pynthikna ba kan ym don kano kano ka jingshah pynthut ki kali kit bad khaïi mar rep.
“Ngan phah ka khubor sha u DGP ka Jylla ban pynthikna ba ki kali kiba la ïoh pass na ka tnad bad bor pyniaid District ban kit bad khaïi mar rep kim dei ban shah pynthut”, u la ong.
