Shillong, Rymphang 05: U Myntri ka sorkar pdeng u Kiren Rijiju mynta ka sngi u la wan ban ia kynduh ia ki nongtrei ka party BJP ha Meghalaya ban pynshai ha kaba ia dei bad ka mang tyngka na ka bynta u snem 2022-2023, la ong ba ha kane ka snem mang tyngka ka sorkar pdeng kala mang haduh hynniewphew phra hajar klur ia ki jylla North East.
Haba kren ha ki lat pathai khubor ha dien ka jingialang bad ki nongtrei jong ka party ha ophis jong ka party la ong ba hapoh ka jingialam jong u myntri rangbah duh ka Ri India u Narendra Modi ym tang ba u ieit ia kane thain u da leh da ki kam ei na kane ka daw la la pynkiew ia ka jingmang pisa na ka bynta ki jylla ka North East.
U Kiren Rijiju u la kyntu ia ki jylla ka dong shatei lam mihngi jong ka Ri India ba kin pyndon kam ia kane ka pisa kaba la mang na ka bynta ban kyntiew ia ka roi ka par ha kane ka thain shatei lam mihngi, mynta ka shong ki jylla kane ka thain ban pyndon kam ia ka pisa kaba la mang.
Haba jubab ia ki jingkylli ha kaba ia dei bad ka jingbei pisa ha ki skhim pynroi, na ka liang jong u Myntri ka sorkar pdeng u la ong ba don tang khyndiat ki skhim kiba ki sorkar jylla kane ka thain ki hap ban sei 10%, kiba bun ki skhim dei kiba ka sorkar pdeng ka bei pisa ki dei ki kran na ka sorkar pdeng khamtam ki surok.
