Shillong, Risaw 12: U President ka seng HANM u bah Lamphrang Kharbani u la ong ba ka sorkar pdeng kam shym la shim khia ia kaei kaba ka iing dorbar thawain ka jylla Meghalaya kala shim ia ki rai halor ki ar tylli mat kaba ki paidbah ka jylla kila dawa la bun bun phew snem.
La ong ba ka iing dorbar thawain ka jylla kala shim ia ka rai ha ka 27th Nailur 2018 ban dwa na ka sorkar pdeng ban pynrung ia ka ktien Khasi bad Garo ha ka khyrngit kaba phra jong ka Riti Synshar ka Ri India bad ha ka 19th Nohprah 2019 kala shim ia ka rai ban pyntrei kam ia ka Bengal Eastern Frontier Regulation Act 1873 hapoh ka jylla.
Kaei kaba jia haduh mynta ka sorkar pdeng ka khlem pat pdiang ia ka rai jong ka iing dorbar thawain ka jylla, na ka liang jong ka seng ka shim ba kane ka jingdawa kaba la ialam da ka sorkar ka dei ruh ka bynta jong ki seng bhalang ban ai ka jingkyrshan, ban pynbor ia ka sorkar pdeng ban pynrulong ia ki jingdawa ka seng kan leit ban pynlong ia ka jingiakhih ha Jantar Mantar ha Delhi.
Haba ia dei bad kane ka seng kala ioh ia ka jingbit na ka tnad pulit jong ka nongbah Delhi ba kin pynlong ia ka jingiakhih shong kyllain mungor ha ka 3rd Naiwieng 2023 bad na ka liang ka seng ka khot kawer ia baroh ki briew jong ka jylla Meghalaya kiba lah ban ia poi kin ia don lang lang ha kane ka jingiakhih.
Ha katei ka jingleit sha Delhi na ka liang jong ka seng kala ia kynduh ruh ia u MP Rajya Sabha jong ka BJP u Rakhesh Sinha ba dei peit ia ka North East ha kaba kila ia kren ia kitei ki mat bad kum juh ban ong ba ka sorkar pdeng ka dei ban ai ka jingkyrshan ia ka sorkar Meghalaya bad Assam ha kane ka jingpynbeit pud.
Na ka liang jong u MP ka BJP u la ong ba ia kine ki mat jingdawa yn sa ia kren bad u myntri rangbah duh jong ka Ri India ynda la dep ka elekshon sha ka iing dorbar thawain ka jylla Madhya Pradesh.
Ka seng ka ai khublei ruh iaka ophis jong Residence Commissioner ka sorkar jylla kaba la phah briew ban leit ai ia ki dorkhas sha ka ophis jong ka President, Myntri Rangbah duh ka Ri India, ka Tnad kampoh iing bad ar ngut ki myntri kabinet na kane ka thain sha tei lam kih ngi ka Ri India.
