Shillong, Rymphang 13: u Bah Prestone Tynsong myntri jong ka sorkar jylla, ha ka jingiakynduh ia ki rangbah jong ki hynniew shnong na ka thain Mawkliaw mynta ka sngi u la ong ia ki ba kam don jingeh ei ei ruh em ban pynrung ia kine ki shnong hapoh jong ka Pynursla Civil Sub-Division lada ki paidbah ki kwah.
Halor kane ka jingkren jong u myntri ka sorkar jylla ki riew rangbah na ka thian Mawkliaw kila hun ia kaei kaba u myntri u la kren ha khmat jong ki ha kane ka jingiakynduh mynta ka sngi ha karma trei kam jong u tei u myntri.
Katei ka jingiakynduh ka dei ban ia kren halor ka jingbym shah kynthup katei ka shnong hapoh ka Pynursla Civil Sub-Division kaba yn sap lie noh shen ha ka 15 tarik mynta u bnai. Ha katei ka jingiakynduh ba la lamkhmat da u Matabor ka shnong Mawkliaw-Kemrang u bah Thomsing Mawkon, u President ka KSWO u bah Darwin Khongphai, Vice President bah Reebith Riahtam, u sordar barim bah Homsing Khongjee , bah Bires Laso u riew rangbah na katei ka shnong.
H akane ka jingiakynduh u bah Prestone u la kren shai ha ki ba kim dei ban khih khuslai jingmut eh namarba lada u paidbah u kwah kam don jingeh eiei ban pynrung ia katei ka thaiñ hapoh Pynursla CSD. Ki la iathuh ha u bah Prestone ba kan don ka jingialang paidbah ha ka 18 tarik ha ka shnong Mawkliaw –Kemrang ha kaba baroh ki 7 shnong kin poi sha katei ka jingialang ban shim rai da u paidbah ba bun.
U bah Prestone u la ong ba kan bha eh lada ki paidbah kin rai dalade hi bad ban pynpoi ia ka jingthoh sha ka sorkar hynrei u la ong ba lada kam long ha katei ka dur hap ban phah da ka kynhun ki ophisar ban pynlong ia ka Public hearing ban sngap ia ka sur u paidbah naba u la ioh jingtip ba kiba bun ki paidbah ki kwah ban ia soh bad ka Pynursla CSD bad u la ioh jingtip ruh ba ia katei ka rai la shu shim tang da ki katto katne ngut ki riew rangbah khlem da pan ia ka jingsngew lane ka jingkwah u paidbah.
