Shillong, Iaiong 27: U Lat jong ka jylla u Satya Pal Malik mynta ka miet u la khot ia ka jingialang bad u Myntri Rangbah ka jylla u Conrad K Sangma, ha ka jingiadon lang u myntri ka tnad ka koit ka khiah u ban ia kren halor ka jingiadei bad ka khlam COVID-19.
Ha kane ka jingialang na ka liang jongu Myntri Rangbah ka jylla u Conrad u la batai ia ka jinglong jingman kane ka khlam COVID-19 ha ka jylla bad kaei kaba ka sorkar kala leh ban ia khun pyrshah ia kane ka khlam COVID-19 ha kane ka jylla, la ka dei ka jingdon ki jingthiah, ICU bad ki Oxygen.
Ha kane ka jingialang u Myntri Rangbah u la batai ia ki jingpynkhreh jong ka sorkar ban ia leh pyrshah ia kane ka khlam COVID-19, la iathuh kumba ka long haduh mynta kiba don ia kane ka jingpang ha ka jylla ki don 1456 ngut, ka sorkar kala shna ia ki kyndon kiba thymmai na ka bynta ban shong ha ki iing ki sem na ka bynta kito kiba ioh Positive.
La iathuh ban a ki 1456 ngut kiba ioh ia kane jingpang 1200 ngut dei kiba hapoh ka 45 snem ka rta bad dei tang ka jingai Tika ban iada na ka jingsaphriang kane ka jingpang, kumba ka long mynta ka jingdon ki dawai Tika ka biang ha ka jylla, ia mynta ki don 65 tylli ki jingthiah ha ki ICU bad 700 tylli ki jignthiah bad kidon ia ki Oxygen.
Ha kane ka jingiakynduh bad u Lat ka jylla u myntri rangbah u la ong ba ka sorkar jylla kam shym la sangeh ka jingtest ia ki briew naduh mynshem snem haduh mynta bad ka jingai dawai ruh ka iaid ryngkat ryngkat. Ha kane ka jingiakynduh la don lang ruh u Director ka tnad ka koit ka khiah u Dr Aman War, Ram Kumar, Mission Director NHM.
Na ka liang jong u Lat ka jylla u la pynpaw ia ka jingsngew kmen ha kaba ia dei bad ka jingpynkhreh ka sorkar ban ia khun pyrshah na ka jingsaphriang kane ka khlam COVID-19 bad ha kane ka jingialang la kyntu ia ka sorkar ba kan dang pynshlur shuh shuh ia ki briew ban ai Tika.
La kyntu ruh ia ka sorkar ba lada long kaba lah ba ia kito kiba dong ka jingshitom kiba dang lah ban sumar ha ki iing ki sem dei ban pynshlur ba kin sumar ha ki iing ki sem ban lait na ka jingkhapngiah ki Hospital, ha kaba ki doctor kin leit ban sumar ha ki iing ki sem,ia kaba ka sorkar kala pdiang ia kane ka jingai jingmut na u Lat ka jylla.
