Shillong, Jylliew 20: Ka Khasi Students’ Union (KSU) lyngba kane ka kyrwoh ka kwah ban pynpaw sha ka pyrthei halor ka jingleh donbor jong ka district administration jong ka Ri Bhoi lyngba ka Police Depatment. Kum ban shu pynkynmaw ka district administration jong ka Ri Bhoi ba la lam khmat da u CP Gotmare Deputy Commisioner bad u Ramesh Singh Superintendent of Police ki la thombor ia ka hok longbriew man briew jong ki dkhot ka KSU bad ki paidbah ha ka 27/05/2017 ha Shangbangla bad Nongpoh ha kaba ki la ai hukum ia ki pulit CRPF bad ki pulit ka jylla ban bom ban tied naphang ia ki dkhot ka seng khlem da don kano kano ka daw lane ka nongrim kaba biang.
Ki dkhot ka seng ki khlem don kano kano ka jingpyneh ne pynibor ia ka district administration hynrei ki pulit ki la shu bom naphang ia ki katna ba ioh naduh Shangbangla tad haduh ha Nongpoh. Kane shwa ka la pyni shai bad kine ar ngut ki briew kim don kata ka jingthrang ne jingangnud ban trei na ka bynta ka bha ka miat ka thain hynrei ki kwah beit tang ban pyni ba ma ki ki long ki khla jong ka district.
Hadien kane ka jingjia, ki nongialam district ki la ai hukum ruh ban kem naphang ia ki dkhot ka seng jong ka tnad North Khasi Hills District Unit ha kaba bun ngut ki dkhot ki la shah kem bad shah set ha along tad haduh mynta. Ki pulit ki la leit ban khynra ia ki iing ki sem jong ki dkhot ka seng ha ki por shiteng miet ha kaba ki la wan syndet da bun tylli ki kali bad da ki riam kum ki paidbah. Kane ka jingle ki pulit lyngba ka hukum u SP ka district ka la pynher syrngiew ia ki bahaiing jong ki dkhot na Ri Bhoi district.
Ym tang kata ki bor synshar district ki la ialeh ban set ruh ia ka sur jong ki nongthoh kotkhubor ha kaba ki la khot hajir ia ki bad maham ruh ia ki nongiasiad ain ka district kiba thmu ban iakhun na ka bynta kito ki dkhot kiba la shah kem. Kane ka la pyni shai ba kine ar ngut ki briew kim pyndep ia la ka kamram kum ki shakri ka sorkar hynrei ki la treikam kum kita ki dictators kiba ka jingthmu ba ha khmat duh ka jong ki ka long beit ban iuhroit ia u paidbah bad ban pynduh pyndam ia kata ka riti synshar paidbah hapoh ka district.
Ki bor district shuh shuh ym tang ba ki la leh donbor ia ki dkhot ka seng, ki nongthoh kotkhubor bad ki nongiasaid ain ka district, hynrei ki la pynjynjar bad pynpisa ruh wat ia ki bahaiing ki dkhot ka seng khamtam ia ki kmie ki kpa. Ka seng ka pynpaw ba ki pulit ki la leit khynra naphang ia ki iing ki sem ym tang ia jong ki dkhot ka seng hynrei wat ia ki iing ki sem jong ki bahaiing jong ki ruh. Shuh shuh ki bor pulit ki la phah hajir ruh wat ia ki kmie ki kpa jong ki dkhot ka seng shapoh thanad khlem kano kano ka nongrim. Kane ka pyni shai kdar ba ka jingthmu jong ki bor district ka long ban pynthud ban pynduh thiah duh dem ia baroh ki bahaiing ki dkhot ka seng khnang ban pynshitom ia ki tang namar ba ki don ba ha iing da ki dkhot ka KSU.
Wat la ka district administration ryngkat bad ki bor pulit jong ka ki thmu ban pyntieng pynsmiej ia ki bahaiing ki dkhot ka seng ha Ri Bhoi hynrei ka seng pat ka pynsngew sha ki ba kaei kaba ki la leh kan ym pynpulom ia ka jingialeh ka seng namar ba ki dkhot ka seng baroh ki long kiba ieng ha ka nongrim bad tad haduh mynta ruh ka seng ka nud ban kop ba ym don uwei ruh u dkhot u ban kynran dien na kane ka jingialeh wat la ka district administration ka la pyndonkam da ki kam buittuh kiba poh ban pynpjah ia ka jingialeh. Hynrei kane ka jingleh jong ka bor synshar district ka dang ai mynsiem shuh shuh ia ki dkhot ka seng ba kin iai ieng skhem hi sbak ha kane ka saw ka sian ban long wait long stieh ia ka jaidbynriew Khasi baroh kawei. Ong u samla Donald V Thabah General Secretary jong ka seng KSU.
