Shillong, Naiwieng 06: Ka Myntri ka tnat ka koit ka khiah ka Kong Ampareen Lyngdoh ha ba iadei ka jingdawa ki nongtrei Accredited Social Health Activist ASHA ha Meghalaya ban kyntiew ia ka bainong kaba ki dei ban ioh man u bnai. Ka la ong ba ki ASHA ki dei kiba trei mon sngewbha, ki ioh ia ka bainong katkum ka kam ba ki trei ha man la ki shnong.
Haba kren sha ki lad pathai khubor hadien ka jingialang jong ka tnat ka koit ka khiah bad u Myntri Rangbah, ka Kong Ampareen ka la iathuh, baroh ki nongtrei ASHA ki ioh ka jingsiew katkum ka kam ba ki trei bad kam don satia ka kyndon ban hap siew da ka jingsiew kaba la pynbeit man u bnai.
Ka Kong Ampareen ka la ong ba lada ki nongtrei ASHA ki trei hok ia ka kam, ki lah ban kamai kumba 5000 haduh 7000 tyngka man u bnai. kala ong, Ha man ki shnong ki nongtrei ASHA ki ioh jingsiew da ka ba leit ban ai jingiarap ia kiba pang Dengue, Malaria, TB bad daka ba iarap ia ki longkmie ba armet lane iaki khunlung ba shitom.
Ka la ong ba ka don da ki kyndon katkum ka National Health Mission NHM ha ka ba iadei ka rukom siew bainong ia ki ASHA bad kane ka rukom ka treikam ha baroh kawei ka Ri India.
Ka la ong ruh Ka rukom treikam jong ki ASHA ka ba man ka sngi, la buddien da ka kor Computer na ka tnat NHM bad lada don ki nongtrei ASHA kiba pep trei, kan paw ha ki Computer bad kane ka lah ban pynduh ia ki ban ioh ia la ki bai nong.
Ka Kong Ampareen ka la iathuh ruh ba ka rukom treikam ki ASHA ka long ar snem snem bad lah ban nang pynjlan shuh shuh ia ka jingtrei jong ki da ka jingiatreilang bad ki Dorbar Shnong bad ka Village Health Council.
