Shillong, Lber 11: U Symbut Myntri Rangbah ka jylla u bah Prestone Tynsong bad dei peit ia ka tnad kiba trei bylla haba jubab ia ka phang ia kren kaba la wanrah da u bah George B Lyngdoh MLA halor ka jingmih khubor ba ki don ki khynnah kiba la pyntrei ha ki karkhana ha Umaim.
U Symbut Myntri rangbah u la ong ba halor katei ka jingmih khubor ka sorkar kala phah tohkit ha inspektor jong ka Ri Bhoi District ha ka 24/Rymphang/2020 bad ia ka kaiphot la phah sha ka sorkar, katkum ka kaiphot ka long ba ha ka karkhana kaba la shah kynnoh ka long ba ki don 6 ngut ki nongtrei bad 20 ngut kiba trei bylla sngi bad kine baroh kim dei ki khynnah.
Ban iada na ka jingpyntrei ia ki khynnah ha ki karkhana ka sorkar kala thung ia ki District Task Force Committee (DTFC) bad ia kane ka kommittee la khlieh da u ne ka Deputy Commissioner jong ka District, ha ka jingiadon lang ki pulit bad na ka tnad Labour jong ka sorkar.
Haba wanrah ia kane ka mat ia kren u MLA ka Umroi u la kdew ba hato kala don em kata ka jingtohkit ha kaba ia dei bad kane ka jingkynnoh, ha ka juh ka por u la ong ba ka long ka jingeh kaba khraw ia ki samla ka jylla namar ym juh tip ba lait kam ha ki karkhana kiba don ha ka jylla.
La ong ba ka tnad ba dei peit ia ki nongbylla ka dei ban peitngor ban nym ai lad ia ki kynhun seng ba kin ioh ban ban peit bad lada ka tnad sorkar ka peitngor kan lait na shibun ki jingjia kiba ym sngew tynnad.
