Shillong, Naitung 16: Ka shnong Nongumbar ka dei ka shnong kaba don tang 25 tylli ki tnum iing haba don ha khappud bad ka Bangladesh ha South West Khasi Hills District ja jngai tang kumba 4 km na ka shnong Nongjri sha phang shati kaba hap ha Cheragoan.
Ha ka jingkren u rangbah shnong u Waiding Ch Marak ha ka sngi ba u bah Myghter Marwein Rangbah shnong ka shnong Nongjri u ai ka jingiarap da ki marbam shnong kitei ki long iing la ong ba ki paidbah nongshong shnong ka Nongumbar kim don ia ka Job Card ban bylla 100 sngi, kim don ia ka light bad kum juh ka um.
Ha kane ka sngi na ka liang jong u rangbah shnong u la pynsngew ba u da kyrpad jur ia ki bor jong ka sorkar ba kin peit lem ia kane ka shnong kaba rit kaba don 25 tylli ki iing ha kaba ki nongshong shnong ki don kam shisha ia ka sorkar ba kan kner lem ia ki kam pynroi sha kane ka shnong.
Ki nongshong shnong jong ka shnong Nongumbar kaei kaba ki don bad ki ka long tang ka dur thep vote ka EPIC bad kane ka shnong ka hap hapoh ka Nongjri Polling Station, u Waiding Ch Marak u da kyrpad ia ka sorkar ba kan kner lem ia ki jingiarap ha kane ka shnong.
Ha kane ka sngi na ka liang jong u rangbah shnong Nongjri u bah Myghter Marwein u la sam da u khaw mar 15 kilo shi tnum iing, u phan u dai bad ka umphniang, kane ka shnong kala shah ktah bha ha kane ka jingpakhang namar ba kim ioh ia ki lat jongiarap na ka sorkar kumba long lem kiwei ki shnong.
