Shillong, Nailar 22: Ka jingsangeh hikai kaba ar taiew lynter kaba la sdang mynta ka sngi da ka seng JACATAM, kala ktah jur ia ki skul ha ka jylla baroh kawei, ha kito ki skul kiba dang dei adhoc bad deficit. Ki khynnah skul kila hap ban shu leit sha ki skul ban ialehkai namar ym don nonghikai.
Haba u SP News Agency u la leit ban peit ia ki katto katne ki skul ha kane ka nongbah Shillong, la iohi ba baroh ki skul kim don nonghikai, ki khynnah skul ki ia shongkai ha ki kamra klas bad kumjuh sha rud sha kiar jong ki skul.
Na ka liang jong ki headmaster , pat kila don beit ha ki skul bad ka kaei kaba ki lah ban leh ka long tang ba kim shim kyrteng ia ki khynnah skul ha ki register katkum ki klas kaba ki pule.
Ha kane ka sngi kaba sdang jong ka jingiakhih jong ki nonghikai kaba ar taiew kala paw shai kdar ba ki ba bun na ki skul ha kane ka jylla ki dei kiba dang shu ioh adhoc bad kiba hap hapoh jong ka deficit. Kumba ka long haduh mynta na ka liang jong ka sorkar kam pat kren ei ei halor kane ka jingiakhih jong ki nonghikai.
La ioh jingtip ba kane ka jingiakhih kala trei kam ha baroh kawei ka jylla bad ki skul kiba dei deficit bad ki adhoc mynta ka sngi ki nonghikai kim shym la treh ban hikai, bad kane kala long ha ka jylla baroh kawei.
